آئندہ دنوں میں گرد آلود ہوائوں،آندھی اور گرج چمک کے ساتھ بارشوں کا الرٹ جاری

منگل 28 مئی 2024 17:06

لاہور (اُردو پوائنٹ اخبارتازہ ترین - اے پی پی۔ 28 مئی2024ء) پی ڈی ایم اے پنجاب نے آئندہ دنوں میں گرد آلود ہواں ،آندھی اور گرج چمک کے ساتھ بارشوں کا الرٹ جاری کردیا ہے ،یہ سلسلہ یکم جون تک جاری رہنے کا امکان ہے ۔ترجمان پی ڈی ایم اے کے مطابق آئندہ دنوں میں پنجاب کے مختلف اضلاع منڈی بہاوالدین، گجرات،گجرانوالہ،حافظ آباد،سیالکوٹ،نارووال،خوشاب،سرگودھا ، میانوالی،لاہور،قصور،اوکاڑہ،فیصل آباد،ٹوبہ ٹیک سنگھ اور جھنگ میں طوفانی ہوائوں کے ساتھ بارش کا امکان ہے۔

دریں اثنا ڈی جی پی ڈی ایم اے عرفان علی کاٹھیا نے کہا ہے کہ پنجاب بھر میں ضلعی انتظامیہ کو موسمی صورتحال سے آگاہ کر دیا گیا ہے،جنوبی پنجاب اور میدانی علاقوں میں گرمی کی لہر برقرار رہے گی لہذا اس دوران کھڑی فصلوں کو طوفان سے نقصان پہنچنے کا اندیشہ ہے۔

(جاری ہے)

انہوں نے کہا کہ وزیر اعلی پنجاب کی ہدایت کے مطابق تمام ضلعی انتظامیہ سمیت محکمہ صحت،آبپاشی،تعمیر و مواصلات ،لوکل گورنمنٹ،لایئو سٹاک،انفارمیشن ڈیپارٹمنٹ،واسا،پنجاب پولیس اور سول ڈیفنس کو موسمی صورتحال کے پیش نظر الرٹ جاری کردیا گیا۔

انہوں نے مزید کہا کہ لوگ آسمانی بجلی سے بچائو کیلئے محفوظ مقامات پر رہیں،بجلی کی گرج چمک اور طوفانی صورتحال میں کھلے آسمان تلے ہرگز نہ جائیں،بچوں کا خاص خیال رکھیں اورانہیں نشیبی علاقوں میں جمع پانی کے قریب ہرگز نہ جانے دیاجائے۔انہوں نے کہا کہ ایمرجنسی کی صورت میں پی ڈی ایم اے ہیلپ لائن 1129 یا ریسکیو 1122سے رابطہ کیا جائے۔