استحکام پارٹی کی پنجاب کابینہ میں شمولیت کا امکان‘ 2 وزارتیں مانگ لیں

دونوں جماعتوں کے درمیان حتمی معاملات علیم خان کی وطن واپسی پر طے پانے کا امکان

ساجد علی جمعرات 30 مئی 2024 16:30

استحکام پارٹی کی پنجاب کابینہ میں شمولیت کا امکان‘ 2 وزارتیں مانگ لیں

لاہور ( اُردو پوائنٹ اخبارتازہ ترین۔ 30 مئی 2024ء ) استحکام پاکستان پارٹی (آئی پی پی ) نے مسلم لیگ ن سے صوبہ پنجاب کی کابینہ میں 2 وزارتیں مانگ لیں۔ میڈیا رپورٹس کے مطابق مسلم لیگ ن کی اتحادی جماعت آئی پی پی نے پنجاب کابینہ میں شامل ہونے کا فیصلہ کرتے ہوئے حکمران جماعت سے صوبے میں 2 وزارتوں کا تقاضا کیا ہے، اس سلسلے میں مسلم لیگ ن سے رکن پنجاب اسمبلی شعیب صدیقی اور غضنفر عباس چھینہ کیلئے وزارتوں کا کہا گیا ہے تاہم ن لیگ کی طرف سے استحکام پاکستان پارٹی کو ایک وزارت دینے کا عندیہ دیا گیا ہے، آئی پی پی کو ایک پارلیمانی سیکریٹری یا کسی محکمے کی چیئرمین شپ بھی مل سکتی ہے تاہم اس کے بارے میں دونوں جماعتوں کے درمیان حتمی معاملات استحکام پارٹی کے صدر علیم خان کی وطن واپسی پر طے ہوں گے۔

(جاری ہے)

بتایا جارہا ہے کہ استحکام پاکستان پارٹی میں اہم تنظیمی تقرریاں بھی کی گئی ہیں، جن کے تحت رانا نذیر احمد خان کو استحکام پاکستان پارٹی پنجاب کا صدر مقرر کیا گیا ہے، شعیب صدیقی سیکرٹری جنرل اور میاں خالد محمود ایڈیشنل سیکرٹری جنرل ہوں گے جنہیں پارٹی صدر عبدالعلیم خان نے تنظیمی امور تیز کرنے اور پارٹی کو مضبوط بنانے کی ہدایت کی ہے، استحکام پاکستان پارٹی کو ضلع اور تحصیل کی سطح پر فعال بنانے کی حکمت عملی بنائی جائے گی، پنجاب کے نئے پارٹی صدر تمام شعبوں کو متحرک کریں گے، جنرل سیکرٹری پنجاب میں پارٹی کا سیکریٹریٹ اور دیگر امور کی نگرانی کریں گے۔

خیال رہے کہ استحکام پاکستان پارٹی کے سربراہ جہانگیر خان ترین نے8 فروری کو ہونے والے عام انتخابات میں ناکام کے بعد مستعفی ہوگئے تھے اس کے ساتھ ہی آئی پی پی کے چیئر مین نے سیاست کو بھی خیر آباد کہہ دیا تھا، جہانگیر ترین عام انتخابات میں قومی اسمبلی کی دو نشستوں سے ہار گئے تھے جن میں این اے 149 اور این اے 155 لودھراں شامل ہیں۔

جہانگیر ترین کا کہنا تھا کہ الیکشن جیتنے والے تمام امیدواروں کو مبارکباد دیتا ہوں، میں اس ہر شخص کا شکریہ ادا کرتا ہوں جس نے مجھے اس الیکشن میں سپورٹ کیا، مخالف امیدوار کو جیت کی مبارکباد پیش کرتا ہوں، پاکستانی عوام کی مرضی کی تہہ دل سے عزت کرتا ہوں، اس لیے میں نے فیصلہ کیا میں بطور آئی پی پی چیئرمین اپنے عہدے اور سیاست دونوں سے مستعفی ہورہا ہوں، اللہ کے کرم سے میں اپنی ذاتی حیثیت میں اپنے ملک کی خدمات جاری رکھوں گا، میری دعا ہے آئندہ چند سالوں میں پاکستان ایک خوشحال ملک بن پر ابھرے۔