طفیل متو سمیت2010 کے انتفادہ کے شہداء کو شاندار خراج عقیدت

منگل 11 جون 2024 15:46

سرینگر (اُردو پوائنٹ اخبارتازہ ترین - اے پی پی۔ 11 جون2024ء) غیر قانونی طورپربھارت کے زیر قبضہ جموں و کشمیر میں 12ویں جماعت کے طالب علم طفیل متو شہید کے اہلخانہ 14 برس گزرجانے کے باوجود انصاف سے محروم ہیں۔کشمیرمیڈیاسروس کے مطابق طفیل متو 2010 میں آج ہی کے دن ٹیوشن سے واپس آتے ہوئے سرینگر کے غنی میموریل اسٹیڈیم کے قریب بھارتی پولیس کی طرف سے داغا گیا آنسو گیس کا گولہ سر میں لگنے سے شہید ہو گیا تھا۔

ان کے قتل پرعلاقے میں زبردست بھارت مخالف مظاہرے پھوٹ پڑے تھے اور بھارتی فوجیوں اور پیراملٹری فورسز کے اہلکاروں نے صرف چند ماہ میں 125 سے زائد پرامن مظاہرین شہید کر دیے تھے۔ طفیل متو کے اہلخانہ ایک دہائی سے زائدعرصہ گزرجانے کے باوجود انصاف کے منتظر ہیں اور شہید کے قاتل تاحال آزاد گھوم رہے ہیں ۔

(جاری ہے)

سرینگر میں مقیم سیاسی ماہرین اور تجزیہ کاروں کا کہنا ہے کہ طفیل متوکا قتل ہو یا قابض فوجیوں کے ہاتھوں انسانی حقوق کی دیگر خلاف ورزیاں بھارت کبھی بھی مقبوضہ جموںوکشمیر میںبھارتی فورسز اہلکاروں کے جرائم کی تحقیقات میں سنجیدہ نہیں رہا اور وہ بے گناہ لوگوں کے قاتل اپنے فوجیوں کو سزا دینے کے بجائے انعامات دے رہا ہے۔

ان کا کہنا ہے کہ کشمیری اپنے شہداء کی قربانیوں کو کبھی فراموش نہیں کریں گے اور اپنے ناقابل تنسیخ حق، حق خود ارادیت کے حصول کے لیے اپنی منصفانہ جدوجہد مکمل کامیابی تک جاری رکھیں گے۔دریں اثناء کل جماعتی حریت کانفرنس کے رہنماؤں اورسوشل میڈیا پر لوگوں نے طفیل متو اور 2010 کے انتفادہ کے تمام شہداء کو شاندار خراج عقیدت پیش کیا ہے۔