دبئی میں تیرتے ولاز تیار‘ فروخت و کرایہ پر دستیاب ہوں گے
دو بیڈ روم ولا 2 ارب اور چار بیڈ روم ولا 3 ارب پاکستانی روپے سے زائد میں خریدے جا سکیں گے
ساجد علی منگل 2 جولائی 2024 17:45
دبئی ( اُردو پوائنٹ اخبارتازہ ترین۔ 02 جولائی 2024ء ) متحدہ عرب امارات کی ریاست دبئی جو اپنی عیش و آرام کی زندگی کے لیے مشہور ہے، وہاں اب تیرنے والے ولا خلیج عرب کے فیروزی پانیوں کی سیر کرائیں گے، یہ فروخت اور کرایہ دونوں کیلئے دستیاب ہوں گے۔
خلیج ٹائمز کے مطابق ان تیرتے ولاز کی تعمیر ہاؤس بوٹس سے مشابہ ہے، اس منصوبے کے لیے 48 آبی جہازوں کو دوبارہ تیار کیا جا رہا ہے، یہ ولاز مکمل طور پر متحدہ عرب امارات میں تیار کیے جائیں گے، 29 ملین درہم میں دو بیڈ روم والا ولا آئے گا، تین بیڈ روم پر مشتمل ولا کی قیمت 32 ملین درہم اور چار بیڈ روم والے ولا کی قیمت 46 ملین درہم ہوگی، کل اڑتالیس ولاز میں سے آٹھ اس وقت تکمیل کے آخری مراحل میں ہیں جو دبئی پام مرینا میں لنگر انداز ہیں۔
البحراوی گروپ کی کمرشل ڈائریکٹر کلاڈیا گومز کا کہنا ہے کہ 'نیپچون' پہلا تیرتا اور موبائل ولا کیمپنسکی فلوٹنگ پیلس ریزورٹ پروجیکٹ کا حصہ ہے، اس منصوبے میں 48 لگژری موبائل ولاز شامل ہیں، ان میں ایک تیرتا ہوا ہوٹل بھی ہے، اس منصوبے کی تکمیل پر اس کی مارکیٹ ویلیو تقریباً 1 اعشاریہ 6 بلین درہم ہوگی، یہ دنیا میں اپنی نوعیت کا پہلا پروجیکٹ ہے، مثال کے طور پر مالدیپ میں بہت سارے تیرتے ولا ہیں لیکن وہ سب ایک ہی جگہ پر رکے ہوئے ہیں۔
(جاری ہے)
انہوں نے بتایا کہ ان ولاز میں دو منزلہ ترتیب کے علاوہ ایک چھت بھی ہے، جو مجموعی طور پر 6 ہزار 300 مربع فٹ یا 2 ہزار 100 مربع فٹ فی لیول پر پھیلی ہوئی ہے، آف پیک سیزن کے دوران یہ ولاز 50 ہزار درہم فی رات کی ابتدائی قیمت پر کرائے پر دیے جائیں گے، ہم یاٹ کی طرح فی گھنٹہ کرایہ نہیں لیتے، ہر ولا میں کل چھ افراد کا عملہ ہے، جن میں ایک کپتان، تین ڈیک ہینڈز اور دو اسٹیورڈز شامل ہیں۔
گومز نے نشاندہی کی کہ ہر ولا کی تعمیر میں عام طور پر 12 مہینے لگتے ہیں جب کہ چار بیڈ روم والے کچھ زیادہ وقت لیتے ہیں، دو بیڈ روم والے ولا 5 ہزار 800 مربع فٹ، تین بیڈروم 6 ہزار 500 مربع فٹ اور چار بیڈ روم والے ولا کافی کشادہ، چوڑے اور لمبے ہیں جن کی پیمائش 10 ہزار 400 مربع فٹ ہے، تقریباً 220 ٹن وزنی، تین بیڈ روم والے ولا کے گراؤنڈ فلور میں ایک لونگ روم، ایک اوپن ڈائننگ ایریا، ایک کچن، ایک گیسٹ ریسٹ روم، ایک کریو چیمبر، ایک سروس روم، ایک کاک پٹ، باہر بیٹھنے کی جگہ، جیٹ اسکیز کو ذخیرہ کرنے اور لانچ کرنے کے لیے ڈیزائن کیا گیا ایک پلیٹ فارم ہوگا، بالائی سطح میں تین بیڈروم، واک ان الماری اور دو باتھ روم شامل ہیں، چھت ایک پرائیویٹ انفینٹی سوئمنگ پول سے مزین ہے جو شیشے کی دیواروں سے گھرا ہوا ہے، اس کے ساتھ بیرونی بیٹھنے کی جگہ، ایک مخصوص باربی کیو ایریا، ایک بیرونی ڈرائیونگ کنٹرول سٹیشن اور ایک ڈسپلے اسکرین ہے۔
ان کا کہنا ہے کہ اگر کوئی کلائنٹ ولا خریدنے کا فیصلہ کرتا ہے تو ان کے پاس دو اختیارات ہوں گے، خریداری کے بعد وہ کیمپنسکی کو ولا کا انتظام کرنے اور کرایہ پر دینے کی اجازت دے سکتے ہیں، کرایہ کی آمدنی سے فائدہ اٹھاتے ہوئے یا وہ اسے ذاتی استعمال کے لیے رکھنے کا انتخاب بھی کر سکتے ہیں، جب یہ ہوٹل کے انتظام کے تحت ہوتا ہے تو اس میں مہمان نوازی میں تربیت یافتہ عملہ اعلیٰ سطح کی خدمت کو یقینی بناتا ہے، اگر یہ نجی استعمال کے لیے ہے تو ہم ولا کو برقرار رکھنے کے لیے کم از کم چھ افراد کا عملہ بھی فراہم کر سکتے ہیں یا مالک اپنا عملہ بھی استعمال کر سکتا ہے۔
البحراوی گروپ کی کمرشل ڈائریکٹر نے کہا کہ بہت سے مالکان کے پاس پہلے سے ہی ایک کیپٹن اور عملے کے ساتھ ایک یاٹ موجود ہے جو خود بھی اس ولا کا انتظام کر سکتے ہیں، اگر کوئی مالک اس سائز کے جہاز کو چلانے کا اہل ہے، تو وہ خود ایسا کر سکتا ہے، ہم اتنے بڑے جہاز کو چلانے کے آلات اور تفصیلات کو سمجھنے میں ان کی مدد کر سکتے ہیں، اس ولا پر برج العرب کا ایک راؤنڈ ٹرپ عام طور پر دو گھنٹے کا ہوتا ہے جب کہ ابوظہبی کے یک طرفہ سفر میں 12 گھنٹے لگتے ہیں۔
انہوں نے مزید کہا کہ نیپچون ولاز لوگوں کے لیے لطف اندوز ہونے کی چیز ہے جو ساحل کے ساتھ آہستہ آہستہ چلتے ہیں لیکن کھلے پانیوں میں نہیں جاتے، اس کی سیر کی رفتار 6 سے 8 ناٹس تک ہے، جس کی زیادہ سے زیادہ رفتار 12 ناٹس فی گھنٹہ ہے، اس میں ماحول دوست انجن استعمال کیے گئے ہیں جو بجلی سے بھی کام کر سکتے ہیں، راس الخیمہ کے شپ یارڈ میں ہر چیز کو ڈیزائن کیا گیا ہے اور کیمپنسکی کے تعاون سے انہیں یہاں مکمل طور پر تعمیر کیا گیا ہے، جنہوں نے ان کی ترتیب اور سجاوٹ میں تعاون کیا، ہر چیز پرتعیش تجربے کے لیے تیار کی گئی ہے، یہ ایک ٹھوس سرمایہ کاری ہے کیوں کہ ان ولاز کا انتظام ایک لگژری ہوٹل مینجمنٹ کمپنی کرتی ہے۔
گومز کا دعویٰ ہے کہ یہ موبائل ولاز سرمایہ کاروں کو تقریباً 8 فیصد کا ریٹرن آن انویسمنٹ پیش کرتے ہیں، یہ ایک خصوصی اثاثہ ہے جو اس کے مالکان کے لیے منفرد چیز ہے، ان کا جدید ترین تکنیکی نظام ولا کی کشش کو مزید بڑھاتا ہے، موبائل آلات کے ذریعے تفریحی اسکرینوں تک آسان رسائی ممکن بنائی گئی ہے، روشنی اور درجہ حرارت کے لیے سمارٹ کنٹرول سسٹم فعال کیا گیا ہے، فی الحال یہ ولا بنیادی طور پر روسیوں اور ہندوستانیوں کو فروخت کیے گئے ہیں۔ البحراوی گروپ کے چیئرمین محمد البحراوی نے کہا کہ اس پروجیکٹ کی کامیابی مختلف ایشیائی اور مغربی ممالک کے سرمایہ کاروں کی جانب سے حاصل کی گئی نمایاں دلچسپی سے ظاہر ہوتی ہے، ہمارا عزم دبئی اور یو اے ای کے معیار اور لگژری کے غیر معمولی معیارات کو برقرار رکھنا ہے۔
ساجد علی
منگل 2 جولائی 2024
17:45
