مون سون سیزن کے دوران 30 فیصد زیادہ بارشوں کی پیشنگوئی کی گئی ہے،کمشنر راولپنڈی ڈویژن

بدھ 3 جولائی 2024 23:21

راولپنڈی (اُردو پوائنٹ اخبارتازہ ترین - اے پی پی۔ 03 جولائی2024ء) کمشنر راولپنڈی ڈویژن انجینئر عامرخٹک نے کہاکہ موجودہ مون سون سیزن کے دوران 30 فیصد زیادہ بارشوں کی پیشنگوئی کی گئی ہے۔ نالہ لئی کی ڈیسلٹنگ کا کام 10 جولائی تک ہر صورت مکمل کیا جائے،نالہ لئی سمیت دیگر برساتی نالوں کی صفائی یقینی بنائی جائے،نالوں کی صفائی کے سلسلے میں کسی قسم کی کوتاہی برداشت نہیں کی جائے گی۔

انہوں نے کہاکہ نالہ لئی میں کچرا پھینکنے کی روک تھام کے لیے دفعہ 144 نافذالعمل ہے اس پر سختی سے عملدرآمد یقینی بنایا جائے۔ ان خیالات کا اظہار انہوں نے ڈویژن کوآرڈینیشن کمیٹی کا اجلاس کی صدارت کرتے ہوئے کیا۔کمشنر راولپنڈی ڈویژن انجینئر عامرخٹک نے کہاکہ قدرتی آفات کو تو روکا نہیں جاسکتا بروقت اقدامات سے کسی بھی بڑے نقصان سے بچا جاسکتا ہے، بارشیں ہونے کی صورت میں آر ایم سی اور واسا سمیت دیگر متعلقہ کے تمام محکموں کے افسران اور اہلکار کی چھٹیاں منسوخ ہونگی،بارش کے پانی کی نکاسی کے لیے بروقت اقدامات کیے۔

(جاری ہے)

شہر بھر میں سیوریج سسٹم کو بہتر کرنے کے لئے راولپنڈی ویسٹ مینجمنٹ کمپنی نالیوں کی صفائی کرے تاکہ بارش زیادہ ہونے کی صورت میں سیوریج سسٹم فعال ہو۔ انہوں نے کہاکہ شہر بھر میں خصوصی طور پر نالوں میں کہیں گندگی کی شکایت نہ ہو۔میونسپل کار پوریشن نالوں کے کناروں سے تجاوزات کا مکمل خاتمہ یقینی بنائیں۔واسا کی مشینری بھی سڑکوں اور گلیوں کو بارش کے دوران کلیئر رکھے۔ انہوں نے کہاکہ رتہ امرال، کٹاریاں،ٹیپو روڈ،ڈ ھوک نجو،گوالمنڈی اورضیاء الحق کالونی کے ایریاز میں خصوصی توجہ دی جائے،نالہ لئی میں سب سے زیادہ خطرناک گوالمنڈی کا علاقہ ہے اس ایریا میں سیلابی صورتحال سے نمٹنے کیلئے خصوصی اقدامات کیے جائیں۔ \378