تحریک انصاف کے جلسے کا اجازت نامہ منسوخ

چیف کمشنر اسلام آباد نے سیکیورٹی کی موجودہ صورت حال کو وجہ قرار دیتے ہوئے جلسے کا اجازت نامہ منسوخ کر دیا

محمد علی جمعہ 5 جولائی 2024 22:41

اسلام آباد( اردوپوائنٹ اخبارتازہ ترین۔ 05 جولائی 2024ء) تحریک انصاف کے جلسے کا اجازت نامہ منسوخ ، چیف کمشنر اسلام آباد نے سیکیورٹی کی موجودہ صورت حال کو وجہ قرار دیتے ہوئے جلسے کا اجازت نامہ منسوخ کر دیا۔ تفصیلات کے مطابق تحریک انصاف کو ایک مرتبہ پھر اسلام آباد میں جلسے کے انعقاد سے روک دیا گیا ہے۔ اسلام آباد انتظامیہ کی جانب سے تحریک انصاف کو پشاور روڈ ترنول کے مقام پر جلسے کی اجازت دی گئی تھی تاہم اب انتظامیہ نے سیکیورٹی خدشات اور دہشت گردی کے سبب اجازت نامہ منسوخ کردیا ہے۔

چیف کمشنر اسلام آباد کی زیر صدرات محرم الحرام اور دیگر سیکورٹی خدشات کی صورت حال کا جائزہ لینے کے لئےاعلی سطح اجلاس منعقد ہوا، جس میں سیکیورٹی اداروں کے افسران نے بھی شرکت کی جبکہ سیاسی جماعت کا کوئی بھی نمائندہ دعوت کے باوجود اجلاس میں شریک نہیں ہوا۔

(جاری ہے)

اجلاس میں جلسے سے متعلق درخواستوں کو بھی جائزہ لیا گیا اور ڈپٹی کمشنر کی طرف سے دی جانے والی اجازت کا موجودہ سکیورٹی خدشات کے تناظر میں از سر نو جائزہ لیا گیا۔

چیف کمشنر اسلام آباد نے درخواستوں، سیکیورٹی کی موجودہ صورت حال، محرم الحرام کی آمد اور سیکورٹی خدشات، قانون نافذ کرنے والے اداروں کی سفارشات کی روشنی میں جلسے کا این او سی معطل کرنے کا فیصلہ کیا۔ اسلام آباد انتظامیہ کی جانب سے جاری اعلامیے میں بتایا گیا ہے کہ جلسے کے این او سی کی معطلی کا فیصلہ شہریوں کے جان و مال کے تحفظ کے لئے کیا گیا ہے، اسلام اباد میں امن عامہ کو برقرار رکھنا اور شہریوں کے جان و مال کا تحفظ ہماری ترجیح ہے۔