چینی 66 پیسے سستی ہو گئی

چینی کی اوسط قیمت 179.33 سے کم ہو کر 178.67 روپے کلو پر آ گئی

محمد علی جمعہ 8 اگست 2025 21:40

لاہور (اُردو پوائنٹ اخبارتازہ ترین۔ 08 اگست2025ء) چینی 66 پیسے سستی ہو گئی۔ تفصیلات کے مطابق مختلف شہروں میں چینی کی قیمت میں معمولی کمی ریکارڈ کی گئی ہے۔ ادارہ شماریات کے دعوے کے مطابق ملک میں گزشتہ ہفتے چینی کی اوسط قیمت میں 66 پیسے فی کلو کمی واقعی ہوئی جس کے بعد چینی کی اوسط قیمت 179.33 سے کم ہو کر 178.67 روپے کلو پر آ گئی ۔ تاہم ملک بھر میں چینی کی اوسط قیمت سرکاری ریٹ پر نہ آسکی۔

چینی کی قیمتوں کے حوالے سے وفاقی ادارہ شماریات کے نئے اعداد و شمار کے مطابق ملک میں چینی کی زیادہ سے زیادہ قیمت 190روپے فی کلو تک برقرار ہے۔ادارہ شماریات کی جانب سے جاری ہونے والی تفصیلات میں بتایا گیا کہ کراچی، پشاور، بہاولپور کے شہری ملک میں سب سے مہنگی چینی خرید نے پر مجبور ہیں۔

(جاری ہے)

ملک میں چینی کی اوسط قیمت 178 روپی67 پیسے فی کلو پر آگئی ہے، کراچی، پشاور، بہاولپور میں چینی کی قیمت 190روپے ہے۔

پنجاب میں چینی کی زیادہ سے زیادہ قیمت 190 روپے فی کلو تک ہے، اسی طرح وفاقی دارالحکومت اسلام آباد میں چینی کی قیمت سرکاری ریٹ کے مطابق 172 روپے ہے، راولپنڈی سمیت پنجاب کے کئی شہروں میں چینی 173 روپے کے سرکاری نرخ پر آگئی۔ایک ہفتے میں چینی کی اوسط قیمت میں 66 پیسے فی کلو کی مزید کمی ہوئی ہے۔ گذشتہ ہفتے تک چینی کی اوسط قیمت 179 روپے 33 پیسے فی کلو تھی جبکہ ایک سال قبل ملک میں چینی کی اوسط قیمت 146 روپے 75 پیسے فی کلو تھی۔ وفاقی حکومت نے 15جولائی سے چینی کی ایکس مل قیمت 165 روپے فی کلو مقرر کرنے کا اعلان کیا تھا،اسلام آباد میں 172، پنجاب اور کراچی میں چینی کی ریٹیل قیمت 173 روپے فی کلو مقرر کی گئی تھی۔