کریم آباد ،دہشتگردوںکی فائرنگ سے شہید ڈی ایس پی علی رضا کی دوران سروس خدمات سامنے آگئیں

ڈی ایس پی علی رضا تحریک طالبان پاکستان،اور لیاری گینگ وار سمیت متعدد دہشت گرد تنظیموں کیخلاف آپریشن کا اہم حصہ رہے

پیر 8 جولائی 2024 20:35

کراچی(اُردو پوائنٹ اخبارتازہ ترین - این این آئی۔ 08 جولائی2024ء) کریم آباد میں دہشت گردوں کی فائرنگ سے شہید ہونے والے ڈی ایس پی علی رضا کی دوران سروس خدمات سامنے آگئیں۔کراچی کے علاقے کریم آباد میں دہشت گردوں کی فائرنگ سے شہید ہونے والے ڈی ایس پی علی رضا 1968 میں پیدا ہوئے اور 1990 میں محکمہ پولیس میں اے ایس آئی بھرتی ہوئے۔

(جاری ہے)

شہید مختلف تھانوں میں بحیثیت ایس ایچ او تعینات رہے، انہوں نے پانچ سال سی آئی اے میں ڈیوٹی انجام دی اور شہید چوھدری اسلم کے قریبی ساتھی رہے۔

شہید علی رضا تحریک طالبان پاکستان، کالعدم جہادی تنظیم اور لیاری گینگ وار سمیت متعدد دہشت گرد تنظیموں کے خلاف آپریشن کا اہم حصہ رہے ہیں۔شہید گذشتہ 18 سال سے سی ٹی ڈی میں تعینات رہے ہیں جب کہ وہ پانچ بہنوں کے اکلوتے بھائی تھے۔انہوں نے ایم کیو ایم کے رہنما علی رضا عابدی کے قتل میں ملوث ملزمان کو بھی گرفتار کیا تھا جب کہ 2009 میں لیاری آپریشن کے دوران بھی شہید ڈی ایس پی علی رضا نے اہم کردار ادا کیا تھا۔