Live Updates

عمران خان کے بیٹوں کی کرکٹ میں انٹری

جمائمہ نے سلیمان اور قاسم کی تصاویر شیئر کردیں

ساجد علی اتوار 28 جولائی 2024 12:25

لندن ( اُردو پوائنٹ اخبارتازہ ترین۔ 28 جولائی 2024ء ) قومی کرکٹ ٹیم کے سابق کپتان و معروف کرکٹر اور بانی پاکستان تحریکِ انصاف عمران خان کی سابقہ اہلیہ جمائمہ نے اپنے دونوں بیٹوں سلیمان عیسیٰ خان اور قاسم خان کی تصاویر شیئر کی ہیں۔ تفصیلات کے مطابق جمائمہ نے اپنے سوشل میڈیا اکاؤنٹس پر اپنے دونوں صاحبزادوں، بڑے بیٹے سلیمان عیسیٰ خان کی ویڈیو اور قاسم کی تصویر بطور اسٹوری شیئر کی ہے، جمائمہ کی پوسٹ میں دونوں بھائیوں کو کرکٹ کی سفید یونیفارم میں دیکھا جا سکتا ہے، سلیمان خان کی ویڈیو میں دیکھا جا سکتا ہے کہ میچ ختم ہونے پر وہ بلّا اٹھائے آ رہے ہیں جب کہ اس دوران ان کی ویڈیو ریکارڈ کی جا رہی ہے، اس پوسٹ کے کیپشن پر جمائمہ نے اپنے بڑے بیٹے کو ’مین آف دی میچ‘ قرار دیا ہے جب کہ دوسری پوسٹ پر جمائمہ گولڈ اسمتھ نے قاسم کی تصویر شیئر کرتے ہوئے لکھا کہ ’اور یہ ہیں بہترین فاسٹ بالر‘۔

(جاری ہے)

واضح رہے کہ پاکستان تحریک انصاف کے قائد عمران خان کے پہلی اہلیہ جمائمہ سے 2 بیٹے ہیں، انہوں نے 1995ء میں لندن کی امیر ترین کاروباری شخصیت جیمز گولڈ اسمتھ کی بیٹی جمائمہ سے شادی کی تھی جو کہ 2004ء میں ختم ہو گئی تھی، بعد ازاں انہوں نے پاکستانی میزبان و صحافی ریحام خان سے 2014ء میں شادی کی جو صرف ایک سال ہی چل سکی تھی، بانی پی ٹی آئی کی موجودہ شریکِ حیات کا نام بشریٰ بی بی ہے جن سے انہوں نے 2018ء میں شادی کی تھی۔