الخدمت مدارس تفہیم القرآن کے تحت پورے شہر میں ششماہی امتحانات کا آغاز

مدارس میں زیر تعلیم ہزاروں بچوں کا امتحانی عمل میں شریک ہونااساتذہ کی محنت کاثمرہے -:راشد قریشی ایگز یکٹوڈائریکٹر الخدمت

جمعرات 8 اگست 2024 20:15

کراچی (اُردو پوائنٹ اخبارتازہ ترین - این این آئی۔ 08 اگست2024ء) الخدمت مدارس تفہیم القرآن کے تحت پورے شہر میں مدارس کے طلبہ وطالبات کے ششماہی امتحانات کا آغاز ہوگیا ،ہزاروں بچے ان امتحانات میں شریک ہیں ۔ایگزیکٹو ڈائریکٹر الخدمت کراچی راشد قریشی نے کہا ہے الخدمت مدارس تفہیم القرآن میں زیر تعلیم ہزاروں بچوں کا امتحانی عمل میں شریک ہونااساتذہ کی محنت کو ظاہر کرتا ہے۔

تفہیم القرآن کے نام سے کام کرنے والے الخدمت مدارس مسلکی سوچ سے بالاتر ہوکر معاشرے میں قرآن پاک کی تعلیم کو فروغ دے رہے ہیں ۔ ان خیالات کا اظہار انہوں نے سلیمان مسجد شاہ لطیف ٹاؤن میں الخدمت مدارس تفہیم القرآن کے تحت ہونے ششماہی امتحانات کے معائنہ کے دوران خصوصی گفتگو کرتے ہوئے کیا ۔

(جاری ہے)

اس موقع پرمنیجرالخدمت مدارس تفہیم القرآن حنیف اکبراور الخدمت مدارس ضلع ملیر کے سپر وائزر قاسم ضیاء بھی ان کے ہمراہ تھے۔

ایگزیکٹو ڈائریکٹر الخدمت راشد قریشی نے بچوں اور بچیوں کی کلاسز میں جاکر امتحانی عمل کا مشاہدہ کیا اور اساتذہ کو مختلف ہدایات بھی جاری کیں۔ اس موقع پر انہوں نے مدرسے کے اوقات میں ہونے والی لوڈ شیڈنگ بچاؤ کے لیے متعلقہ حکام سے بات چیت اور سولر پینل کی تنصیب کے لیے متعلقہ شعبے سے بات کرنے کی بھی یقین دہانی کرائی۔