پاکستان کرکٹ بورڈ کا بنگلہ دیش کے خلاف دو ٹیسٹ میچوں کی ہوم سیریز کے لئے میچ آفیشلز کا اعلان

جمعہ 9 اگست 2024 18:35

اسلام آباد (اُردو پوائنٹ اخبارتازہ ترین - اے پی پی۔ 09 اگست2024ء) پاکستان کرکٹ بورڈ نے بنگلہ دیش کے خلاف دو ٹیسٹ میچوں کی ہوم سیریز کے لئے میچ آفیشلز کے ناموں کا اعلان کردیا ہے۔ ترجمان پی سی بی کے مطابق سری لنکا سے تعلق رکھنے والے میچ ریفریز کے آئی سی سی ایلیٹ پینل کے ممبر رنجن مدوگالے پاکستان اور بنگلہ دیش کے دونوں ٹیسٹ میچوں میں آئی سی سی میچ ریفری ہوں گے۔

یہ دونوں ٹیسٹ میچ آئی سی سی ورلڈ ٹیسٹ چیمپئن شپ کا حصہ ہیں۔پہلا ٹیسٹ میچ 21 سے 25 اگست تک راولپنڈی کرکٹ سٹیڈیم میں کھیلا جائے گا۔

(جاری ہے)

دوسرا ٹیسٹ میچ 30 اگست سے 3 ستمبر تک نیشنل بینک سٹیڈیم کراچی میں کھیلا جائے گا۔ٹیسٹ سیریز کے لئے تین امپائرز آئی سی سی ایلیٹ پینل آف امپائرز سے ہوں گے اور دو امپائرز آئی سی سی انٹرنیشنل پینل آف امپائرز سے ہوں گے۔

راولپنڈی ٹیسٹ میں انگلینڈ کے رچرڈ کیٹلبرو اور جنوبی افریقہ کے ایڈرین ہولڈ سٹوک آن فیلڈ امپائر ہوں گے۔ انگلینڈ کے مائیکل گف تھرڈ امپائر جبکہ پاکستان کے راشد ریاض فورتھ امپائر کے فرائض انجام دیں گے۔کراچی ٹیسٹ میں مائیکل گف اور ایڈرین ہولڈ سٹوک آن فیلڈ امپائر کے فرائض انجام دیں گے جبکہ رچرڈ کیٹلبرو تھرڈ امپائراور پاکستان کے آصف یعقوب فورتھ امپائر ہوں گے۔