پنجاب میں بجلی کی قیمتوں میں ریلیف ناکافی قرار‘بجلی کی قیمتیں ایک دو مہینے کیلئے نہیں مستقل کم ہونی چاہئیں،بیرسٹرگوہر

پیر 19 اگست 2024 22:37

اسلام آباد(اُردو پوائنٹ اخبارتازہ ترین - آن لائن۔ 19 اگست2024ء) پاکستان تحریک انصاف کے چیئرمین بیرسٹرگوہر خان نے پنجاب میں بجلی کی قیمتوں میں ریلیف کو ناکافی قرار دیتے ہوئے کہا ہے کہ بجلی کی قیمتیں ایک دو مہینے کیلئے نہیں مستقل کم ہونی چاہئیں،روف حسن پڑھے لکھے آدمی ہیں آرٹیکل لکھتے رہے ہیں، صحافیوں کا صحافیوں سے رابطہ رہتا ہے،رؤف حسن نے کوئی غیرقانونی کام نہیں کیا،پی ٹی آئی بلدیاتی انتخابات میں کلین سوئپ کریگی۔

پی ٹی آئی کے چیئرمین بیرسٹر گوہر خان نے الیکشن کمیشن کے باہر میڈیا سے گفتگوکرتے ہوئے پنجاب میں بجلی کی قیمتوں میں ریلیف کو ناکافی قرار دیدیااورکہا کہ بجلی کی قمیت سب کیلئے کم ہونی چاہیے، بجلی کی قیمتیں ایک دو مہینے کیلئے نہیں مستقل کم ہونی چاہئیں،ان سے بجلی کی قیمتیں کم نہیں ہورہیں ترقیاتی فنڈز سے نکال کر ریلیف دیا جارہا ہے۔

(جاری ہے)

انہوںنے کہا کہ رؤف حسن پڑھے لکھے آدمی ہیں آرٹیکل لکھتے رہے ہیں۔ صحافیوں کا صحافیوں سے رابطہ رہتا ہے،رؤف حسن نے کوئی غیرقانونی کام نہیں کیا۔بیرسٹر گوہرنے کہا کہ اسلام آبادکے بلدیاتی انتخابات میں حصہ لیں گے، پی ٹی آئی بلدیاتی انتخابات میں کلین سوئپ کریگی،امیدوار زیادہ سے زیادہ تعداد میں کاغذات نامزدگی جمع کرائیں۔بیرسٹر گوہرکا کہنا تھا کہ سپریم کورٹ نے چار حلقوں کے کیسز کا فیصلہ کیا تھا‘ بدقسمتی سے ہمارے تحفظات کو نہیں سنا گیا،ہمارے درست ووٹوں کو مسترد کیا گیا،این اے 79 میں پہلے کوئی دوبارہ گنتی کی درخواست نہیں آئی،امید ہے الیکشن کمیشن ہمارے تحفظات سنے گا۔