پی ٹی آئی رکن اسمبلی کی جیل میں سہولیات کیلئے درخواست پر فریقین کو نوٹس،مقدمات کی تفصیلات طلب

پیر 19 اگست 2024 22:59

لاہور (اُردو پوائنٹ اخبارتازہ ترین - آن لائن۔ 19 اگست2024ء) پی ٹی آئی رکن قومی اسمبلی کی جیل میں سہولیات کے لیے عدالت میں دائر درخواست پر فریقین کو نوٹسز جاری کردیئے گئے۔ قومی اسمبلی کے حلقہ این اے 68 سے رکن حاجی امتیاز احمد کو جیل میں سہولیات دینے سے متعلق درخواست پر سماعت لاہور ہائی کورٹ کے جسٹس طارق سلیم شیخ نے کی، جس میں درخواست گزار ناجس بی بی نے موقف اختیار کیا کہ اس کے شوہر پاکستان تحریک انصاف کے رکن قومی اسمبلی ہیں۔

(جاری ہے)

درخواست گزار نے عدالت کو بتایا کہ سیاسی بنیادوں پر اس کے شوہر کو گرفتار کرلیا گیا ہے۔ معاملہ عدالت میں آنے پر بے بنیاد مقدمے میں ملوث کردیا گیا ہے۔ بعد ازاں عدالت نے وفاقی اور صوبائی حکومت ،ہوم سیکرٹری ، آئی جی پنجاب اور دیگر کو نوٹسز جاری کرتے ہوے مقدمات کی تفصیلات طلب کرلیں۔ عدالت نے آئی جی جیل خانہ جات اور سپرنٹنڈنٹ سینٹرل جیل گوجرانوالہ سے جواب طلب کرتے ہوئے درخواست پر سماعت 21 اگست تک ملتوی کردی۔