وزیراعلیٰ پنجاب مریم نوازکی والدہ محترمہ بیگم کلثوم نوازکی چھٹی برسی 11 ستمبرکو منائی جائیگی

پیر 9 ستمبر 2024 11:40

مکوآنہ (اُردو پوائنٹ اخبارتازہ ترین - این این آئی۔ 09 ستمبر2024ء) سابق وزیر اعظم پاکستان اورمسلم لیگ (ن)کے قائد میاں محمد نواز شریف کی اہلیہ سابق خاتون اوّل،،وزیر اعلیٰ پنجاب مریم نواز کی والدہ محترمہ بیگم کلثوم نواز کی چھٹی برسی 11ستمبرکو منائی جائے گی ۔ بیگم کلثوم نواز نے یکم جولائی 1950ء کو اندورن لاہور کے کشمیری گھرانے میں آنکھ کھولی،انہوں نے اعلیٰ تعلیم حاصل کرنے کے بعد اپریل 1971ء میں نواز شریف کے ساتھ ازدواجی زندگی کا آغاز کیا، بیگم کلثوم نواز کے دو بیٹے حسن اور حسین نواز، جبکہ دو بیٹیاں مریم اور اسماء نواز ہیں۔

بیگم کلثوم نواز کو تین دفعہ خاتون اوّل ہونے کا اعزاز حاصل رہا، جبکہ 12 اکتوبر 1999 ء کو جب میاں نواز شریف کی حکومت ختم کر دی گئی تو اس وقت بیگم کلثوم نواز نے مسلم لیگ (ن) کی قیادت سنبھالی، سابق وزیراعظم میاں نوازشریف جب پانامہ کیس میں نااہل ہوئے تو اس وقت ضمنی الیکشن کے لیے مسلم لیگ (ن) نے بیگم کلثوم نواز کو انتخابی میدان میں اتارا،بیگم کلثوم نواز کی انتخابی مہم کامیابی سے ان کی بیٹی مریم نواز نے چلائی۔

(جاری ہے)

این اے 120 کے ضمنی انتخابات میں کامیابی کے باوجود وہ حلف نہیں اٹھا سکیں،بیگم کلثوم نواز کو گلے کے سرطان کی تشخیص ہونے کے بعد علاج کی غرض سے لندن کے ایک نجی ہسپتال منتقل کر دیا گیا تھا اور طویل علالت کے بعد وہ 11 ستمبر 2018ء کو لندن میں انتقال کر گئیں۔