Live Updates

ہر ادارہ اپنی آئینی حدود میں رہ کر اپنے فرائض آئین وقانون کے مطابق سرانجام دے

سیاست میں مداخلت کرنے والے افسران کا کورٹ مارشل کیا جائے، سخت سے سخت سزا دی جائے، خیبرپختونخواہ اسمبلی نے اداروں کی سیاست میں مداخلت کیخلاف قرارداد کثرت رائے سے منظور کر لی

محمد علی بدھ 11 ستمبر 2024 00:40

پشاور (اُردو پوائنٹ اخبارتازہ ترین۔ 10 ستمبر2024ء) خیبرپختونخواہ اسمبلی نے قرارداد منظور کی ہے کہ ہر ادارہ اپنی آئینی حدود میں رہ کر اپنے فرائض آئین وقانون کے مطابق سرانجام دے، سیاست میں مداخلت کرنے والے افسران کا کورٹ مارشل کیا جائے، سخت سے سخت سزا دی جائے۔ تفصیلات کے مطابق خیبرپختونخواہ اسمبلی نے منگل کے روز بلائے گئے اجلاس میں اداروں کی سیاست میں مداخلت کیخلاف قرارداد کثرت رائے سے منظورکرلی۔

قرارداد حکومتی رکن شیرعلی آفریدی نے پیش کی جس کے متن میں کہا گیا کہ ہرادارہ اپنی آئینی حدود میں رہ کراپنے فرائض آئین وقانون کے مطابق سرانجام دے۔ پچھلے دو سالوں سے فوج کے کچھ افسران کی مداخلت ان کے اپنے حلف سے انحراف ہے جوکہ آئین کے آرٹیکل کے مطابق غداری کے زمرے میں آتا ہے۔

(جاری ہے)

یہ اسمبلی متفقہ طور پر اس چیز کا بھی پرزور مطالبہ کرتی ہے کہ ان افسران کے خلاف فوجی قوانین کے مطابق نوٹس لے کران کیخلاف کورٹ مارشل کیاجائے اورسخت سے سخت سزادی جائے اوران کو غیرآئینی،غیرقانونی اورغیرانسانی اقدامات سے بازرکھاجائے۔

یہ ایوان فوج کی لازوال قربانیوں کوخراج تحسین پیش کرتاہے لیکن چند افسران کے ذاتی مفادات نے اس ملک کی جمہوریت کو ناقابل تلافی نقصان پہنچایا ہے۔ یہ اسمبلی متفقہ طور پر پی ٹی آئی قیادت اورکارکنوں کے خلاف کارروائی کی مذمت کرتی ہے اوراس بات کا بھی پرزورمطالبہ کرتی ہے کہ غیرآئینی و غیر قانونی طور پر گرفتار پی ٹی آئی لیڈرشپ کو جلد از جلد باعزت رہا کیا جائے ورنہ حالات کے ذمہ دار فوج کے یہ چند افسران ہوں گے۔ وفاقی حکومت قومی اسمبلی پرشرمناک حملے کی ذمہ داری ہے۔ یہ ایوان عمران خان کی عظیم خدمات کو خراج تحسین پیش کرتاہے اور ان کی فوری رہائی کا مطالبہ کرتا ہے۔