ناپسند لوگوں کا ریمانڈ دیا، من پسند کو گھر بھیج دیا: شیخ رشید

اس طرح منشیات فروشوں کو نہیں پکڑا جاتا جیسے پارلیمنٹ سے ممبران کو گرفتار کیا گیا‘میڈیا سے گفتگو

جمعرات 12 ستمبر 2024 14:59

ناپسند لوگوں کا ریمانڈ دیا، من پسند کو گھر بھیج دیا: شیخ رشید

راولپنڈی (اُردو پوائنٹ اخبارتازہ ترین - این این آئی۔ 12 ستمبر2024ء) سابق وفاقی وزیر شیخ رشید نے کہا ہے کہ ناپسند لوگوں کا ریمانڈ دیا گیا اور من پسند افراد کو گھر بھیج دیا گیا۔راولپنڈی کی انسدادِ دہشت گردی کی عدالت کے باہر میڈیا سے گفتگو کرتے ہوئے انہوں نے کہا کہ اس طرح منشیات فروشوں کو نہیں پکڑا جاتا جیسے پارلیمنٹ سے ممبران کو گرفتار کیا گیا۔

شیخ رشید کا کہنا ہے کہ ایک ممبر بھی اسپیکر پر عدم اعتماد کر سکتا ہے، چاہے وہ ناکام ہو جائے۔

(جاری ہے)

انہوں نے کہا کہ 16 ماہ سے چالان نہیں پیش کیا گیا، یہ 20 سال کا پروگرام لگ رہا ہے۔سابق وفاقی وزیر کا کہنا ہے کہ 40 دن کا چلہ کاٹنے سے بہتر تھا میں 4 سال جیل کاٹ لیتا، میرے ہمدرد تھے ان کے پاس چلہ کاٹا، انہوں نے مجھے معاف نہیں کیا۔شیخ رشید نے کہا کہ ملک کی معیشت آئی ایم ایف نے تباہ کر دی، اداروں کو بدنام کیا جا رہا ہے، بجلی پر ایک اور ٹیکہ لگا دیا گیا، مرے ہوئے لوگوں کو اور مارا جا رہا ہے، ملک تباہ و برباد کر دیا گیا ہے، غریب آدمی زندہ مر گیا ہے۔ان کا یہ بھی کہنا ہے کہ علی امین گنڈاپور میرے دوست ہیں، ان کے بارے میں کوئی بات نہیں کروں گا۔