ویمنز ٹی ٹوئنٹی ورلڈ کپ کی انعامی رقم میں ریکارڈ اضافہ

بدھ 18 ستمبر 2024 17:35

دبئی (اُردو پوائنٹ اخبارتازہ ترین - این این آئی۔ 18 ستمبر2024ء) آئی سی سی ویمن ٹی ٹوئنٹی ورلڈ کپ کی انعامی رقم میں ریکارڈ اضافہ کر دیا گیا۔میڈیا رپورٹ کے مطابق آئی سی سی نے ویمنز ٹی ٹوئنٹی ورلڈ کپ 2024ء کی انعامی رقم کا اعلان کر دیا ہے اور پہلی بار آئی سی سی نے ویمنز ورلڈ کپ کی انعامی رقم کو مردوں کے برابر کیا ہے۔اب ویمنز ٹیم کو مردوں کے برابر انعامی رقم ملے گی۔

ویمنز ٹی ٹوئنٹی ورلڈ کپ کی انعامی رقم کو 79 لاکھ 58 ہزار 80 ڈالر کر دیا گیا ہے اور ورلڈ کپ جیتنے والی ٹیم کو 23 لاکھ 40 ہزار ڈالرز ملیں گے۔انعامی رقم میں 225 فیصد اضافہ کیا گیا ہے۔

(جاری ہے)

ورلڈ کپ کی رنر اپ ٹیم کو 11 لاکھ 70 ہزار ڈالرز کی انعامی رقم ملے گی۔ اسی طرح 221 فیصد اضافے کے بعد ورلڈ کپ کی سیمی فائنلسٹ ٹیموں کو 6 لاکھ 75 ہزار ڈالرز کی ریکارڈ رقم ملے گی۔

گروپ اسٹیج میں میچ جیتنے پر ٹیم کو 31 ہزار 154 ڈالرز کی رقم ملے گی۔علاوہ ازیں ورلڈ کپ کے گروپ اسٹیج سے باہر ہونیوالی ٹیمیں بھی خالی ہاتھ نہیں جائیں گی۔ورلڈ کپ میں شریک 10 ٹیموں کی بیس پرائز 1 لاکھ 12 ہزار 500 ڈالرز رکھی گئی ہے۔ میگا ایونٹ میں پانچویں سے آٹھویں نمبر پر آنے والی ٹیموں کو 2 لاکھ 70 ہزار ڈالرز جبکہ نویں اور دسویں پوزیشن والی ٹیموں کے حصے میں 1 لاکھ 35 ہزار ڈالرز آئیں گے۔