ہونہار سکالرشپ پروگرام مستحق و ہونہار طلبہ کیلئے معیاری تعلیم تک رسائی یقینی بنائے گا، مریم نواز

وزیراعلیٰ پنجاب کی ہدایت پر ہونہار سکالر شپ پروگرام کی رجسٹریشن کا آغاز کر دیا گیا ، پروگرام کے تحت 68 ڈسپلنز میں سالانہ 30ہزارطلبہ کو سکالر شپ دیا جائے گا

فیصل علوی پیر 30 ستمبر 2024 13:28

ہونہار سکالرشپ پروگرام مستحق و ہونہار طلبہ کیلئے معیاری تعلیم تک رسائی ..

لاہور(اردو پوائنٹ اخبارتازہ ترین۔30ستمبر 2024 ) وزیراعلیٰ پنجاب مریم نواز شریف نے کہا ہے کہ ہونہار سکالرشپ پروگرام مستحق اور ہونہار طلبہ کیلئے معیاری تعلیم تک رسائی یقینی بنائے گا،وزیراعلیٰ پنجاب کی ہدایت پر ہونہار سکالر شپ پروگرام کی رجسٹریشن کا آغاز کر دیاگیا،عالمی جاب مارکیٹ کے تقاضوں کے مطابق ہونہار سکالر شپ پروگرام کے تحت 68ڈسپلنز میں سالانہ 30ہزارطلبہ کو سکالر شپ دیا جائے گا۔

50 پبلک سیکٹر یونیورسٹیز، 16 میڈیکل کالجز اور 131 گریجویٹ کالجز کے طلبہ کو ہونہار سکالر شپ دیا جائے گا۔بتایاگیا ہے کہ ہونہار سکالر شپ لمز، فاسٹ،کامسٹ، نسٹ،غلام اسحاق خان انسٹی ٹیوٹ اور 7مزید ٹاپ پرائیویٹ یونیورسٹیز کے طلبہ کو دیا جائے گا۔حکومت پنجاب کے اس پروگرام کے تحت 8 سال میں 130 ارب روپے کے وظائف فراہم کئے جائیں گے۔

(جاری ہے)

پروگرام سے آئندہ 4 سالوں میں ایک لاکھ 20 ہزار طلبہ مستفید ہوں گے۔

طلبہ Honhaarscholarship.punjabhec.gov.pk پر اپلائی کر سکتے ہیں۔اس حوالے سے وزیراعلیٰ پنجاب مریم نواز نے کہا ہے کہ اپنی پہلی تقریر میں کیا ایک اور وعدہ پورا کر دیا۔ ہونہار سکالر شپ پروگرام کا آغاز اہم سنگ میل ہے۔ ہونہار سکالرشپ نوجوانوں کے اعلیٰ تعلیم کے خواب پورے کرے گا۔ نوجوانوں کو اعلیٰ تعلیم اور بہترین روزگار فراہم کرنا چاہتے ہیں۔انہوں نے کہا کہ ہونہار سکالرشپ پروگرام مستحق اور ہونہار طلبہ کیلئے معیاری تعلیم تک رسائی یقینی بنائے گا۔

ہونہار سکالر شپ پروگرام اعلیٰ تعلیم کیلئے ذہین طلبہ کی مالی رکاوٹوں کو ختم کرے گا۔ہونہار سکالر شپ پروگرام میں شفافیت اور میرٹ کو اولین ترجیح دی گئی ہے تاکہ کسی کی حق تلفی نہ ہو۔میں نے سختی سے ہدایات جاری کی ہوئی ہیں کہ بنا سفارش صرف اور صر ف میرٹ پر تمام طلباءوطالبات کو سکالرشپس دی جائیں ۔سفارش کلچر کے خاتمے سے ہی ہم دنیا کے ساتھ مقابلہ کرسکتے ہیں۔میرٹ کی بالادستی کو ہر صورت یقینی بنایا جائیگا۔