صدرزرداری اوروزیر اعظم کامیجر طفیل محمد شہید کو67 ویں یوم شہادت پر خراج عقیدت

پاکستان آج اپنے عظیم سپوتوں کی قربانیوں کی بدولت ہی محفوظ ہے، یوم شہادت پر جاری بیان

جمعہ 8 اگست 2025 12:19

صدرزرداری اوروزیر اعظم کامیجر طفیل محمد شہید کو67 ویں یوم شہادت پر خراج ..

اسلام آباد(اُردو پوائنٹ اخبارتازہ ترین - این این آئی۔ 08 اگست2025ء)صدر آصف علی زرداری اور وزیر اعظم شہباز شریف نے پاکستان کے ہیرو میجر طفیل محمد شہید (نشان حیدر) کو ان کے 67 ویں یوم شہادت پر زبردست خراجِ عقیدت پیش کیاہے۔اپنے الگ الگ پیغامات میں دونوں رہنماؤں نے کہا کہ 67 برس قبل میجر طفیل محمد نے دشمن کے خلاف بہادری سے لڑتے ہوئے مادرِ وطن پر اپنی جان قربان کی۔

(جاری ہے)

صدر مملکت نے کہا کہ پوری قوم میجر طفیل محمد شہید کی قربانی اور بہادری کو سلام پیش کرتی ہے،پاکستان آج ان عظیم سپوتوں کی قربانیوں کی بدولت محفوظ ہے اور ہم اپنے تمام ہیروز کو سلام پیش کرتے ہیں جنہوں نے ملک کی سلامتی کیلئے اپنی جانیں نچھاور کیں۔انہوں نے کہا کہ میجر طفیل محمد شہید کی قربانی قوم کے لیے مشعل راہ ہے اور ہم اپنے شہدا کی قربانیوں کو ہمیشہ یاد رکھیں گے۔وزیر اعظم شہباز شریف نے بھی اس موقع پر کہا کہ پاکستان کو اپنی بہادر افواج پر فخر ہے جو دشمن کا ہر محاذ پر ڈٹ کر مقابلہ کر رہی ہیں۔انہوں نے اس عزم کا اظہار کیا کہ قوم اپنے شہدا کی قربانیوں کو کبھی فراموش نہیں کرے گی اور ان کے نقشِ قدم پر چلتے ہوئے ملک کی حفاظت جاری رکھے گی۔