بھارت میں موجود بنگلہ دیش کرکٹ ٹیم جمعہ کی ادائیگی کیلئے مسجد نہ جا سکی

بنگلا دیشی کھلاڑی جمعے کی نماز کیلئے مسجد جانے کے خواہاں تھے لیکن انتظامیہ کی جانب سے سکیورٹی خدشات کے پیش نظر انہیں اجازت نہ مل سکی : بھارتی میڈیا کا دعویٰ

ذیشان مہتاب پیر 7 اکتوبر 2024 15:53

بھارت میں موجود بنگلہ دیش کرکٹ ٹیم جمعہ کی ادائیگی کیلئے مسجد نہ جا ..

گوالیار (اردو پوائنٹ تازہ ترین اخبار ۔ 7 اکتوبر 2024ء ) بنگلا دیشی ٹیم ان دنوں ٹی ٹونٹی سیریز کیلئے بھارت میں موجود ہے لیکن بنگلا دیشی ٹیم کا بھارت ٹور نماز جمعہ کی ادائیگی کیلئے مسجد نہ جا سکنے کے سبب تنازعات میں گھر گیا۔ بھارتی میڈیا کے مطابق بنگلادیشی کھلاڑی نماز جمعہ کے لئے مسجد نہیں جا سکے اور کھلاڑیوں نے جمعے کی نماز بھی ہوٹل میں ہی ادا کی، میڈیا کا دعویٰ ہے کہ بنگلا دیشی کھلاڑی جمعے کی نماز کیلئے مسجد جانے کے خواہش مند تھے لیکن انتظامیہ کی جانب سے سکیورٹی خدشات کے پیش نظر کھلاڑیوں کو مسجد جانے کی اجازت نہ مل سکی۔

بنگلا دیش میں ہندوؤں کے خلاف ہونے والے مظالم کے جواب میں بھارت میں ہندو تنظیمیں سراپا احتجاج ہیں، بھارتی تنظیم ہندو مہاسبھا نے میچ کے روز شہر کو بند کرنے اور دیگر تنظیموں نے احتجاج کی کال دی تھی۔

(جاری ہے)

تاہم گوالیار کے انسپکٹر جنرل اروند سکسینا نے بھارتی میڈیا کو بتایا کہ گوالیار میں پہلے ٹی ٹوئنٹی میچ کے دوران سکیورٹی کے پیش نظر 2500 سے زیادہ پولیس اہلکار تعینات کیے گئے ، اس سے قبل بھی شہر بھر میں حفاظتی انتظامات کیے گئے لیکن اس کے باوجود بنگلا دیشی ٹیم مسجد نہیں آئی، آئی جی نے بتایا کہ مسجد ہوٹل سے 3 کلومیٹر کے فاصلے پر ہے جہاں مہمان ٹیم مقیم ہے۔

واضح رہے کہ بھارت اور بنگلا دیش کے درمیان دوسرا ٹی ٹوئنٹی 9 اکتوبر کو نئی دہلی جب کہ تیسرا اور آخری ٹی ٹوئنٹی میچ 12 اکتوبر کو حیدر آباد میں کھیلا جائے گا۔