پنجاب میں گاڑی کیلئے من پسند نمبر پلیٹ سکیم کے اجراء کا فیصلہ

وزیراعلی پنجاب مریم نواز کی منظوری کے بعد سکیم کا باقاعدہ اجراءآنے والے دنوں میں کیا جائے گا، کارپوریٹ کیٹگری کے تحت نمبر پلیٹ پر کمپنی کا نام لکھوایا جا سکے گا، پلاٹینم کیٹیگری کے تحت اپنا یا کسی پیارے کا نام لکھوایا جا سکے گا، ڈی جی ایکسائز فیصل فرید

فیصل علوی ہفتہ 12 اکتوبر 2024 12:03

پنجاب میں گاڑی کیلئے من پسند نمبر پلیٹ سکیم کے اجراء کا فیصلہ

لاہور(اردوپوائنٹ اخبار تازہ ترین۔ 12اکتوبر 2024) پنجاب میں گاڑیوں کیلئے من پسند نمبر پلیٹ سکیم کے اجراءکا فیصلہ،من پسند نمبروں کی تین کیٹگریز رکھی گئی ہیں،اس حوالے سے ڈائریکٹر جنرل ایکسائز فیصل فرید کا کہنا ہے کہ وزیراعلی پنجاب مریم نواز کی منظوری کے بعد سکیم کا باقاعدہ اجراءآنے والے دنوں میں کیا جائے گا۔کارپوریٹ کیٹگری کے تحت نمبر پلیٹ پر کمپنی کا نام لکھوایا جا سکے گا،پلاٹینم کیٹیگری کے تحت اپنا یا کسی پیارے کا نام لکھوایا جا سکے گا۔

جبکہ گولڈ کیٹیگری کے تحت تین من پسند حروف اور تین ہند سے لکھوائے جا سکیں گے۔ نمبر پلیٹ کیلئے مذہبی سیاسی یا سماجی منافرت پر مبنی لفظ یا ہندسہ الاٹ نہیں کیا جائے گا۔یاد رہے کہ اس سے قبل من پسند نمبروں کی وینٹی پلیٹس کوحتمی شکل دی گئی تھی۔

(جاری ہے)

ذات برادری،سیاسی پارٹیوں اورسیاسی شخصیات کے ناموں کی پلیٹس نیلامی میں شامل نہیں کی جائیں گی۔

گولڈ کیٹگری 3الفاظ اور 3نمبرز پر مشتمل ہوگی۔گولڈ کیٹگری میں پانچ لاکھ روپے بنیادی قیمت رکھی جائے گی۔کارپوریٹ کیٹگری میں کمپنیز 1کروڑ روپےسے اپنی رجسٹریشن کرائیں گی۔کارپوریٹ کیٹگری میں رجسٹریشن کے بعدلوگو والی پلیٹ پرعام نمبر5لاکھ جبکہ من پسند نمبر10لاکھ میں جاری کیا جائےگا۔من پسند نمبر 3کیٹگریز میں جاری ہونگے۔کم سے کم قیمت 5لاکھ سے 50 لاکھ مقرر کرنے سمری بھجوا دی گئی۔

صوبے بھر میں وینٹی پلیٹس کو3 کیٹگریزپلاٹینم،گولڈ اور کارپوریٹ میں تقسیم کیا گیا ہے۔پلاٹینم کیٹگری میں 8 الفاظ و نمبر پر مشتمل پلیٹس کا اجرا ہوگا۔پلاٹینم کیٹگری کی بنیادی قیمت پچاس لاکھ روپے رکھی جائےگی۔یہ بھی بتایاگیا تھا کہ اپنے نام و نمبرز سے نمبر پلیٹس پندرہ روز تک نیلامی میں رکھی جائیں گی۔قبل ازیں کراچی میں پریمیئم نمبر پلیٹس کی نیلامی میں شہری نے 10 کروڑ روپے کی نمبر پلیٹ خرید ی تھی۔

بتایاگیا تھا کہ پاکستان کی تاریخ میں پہلی مرتبہ محکمہ ایکسائز سندھ کی جانب سے پریمیئم نمبر پلیٹوں کی نیلامی کی تقریب منعقد کی گئی تھی۔ محکمہ ایکسائز کی جانب سے پریمیئم نمبر پلیٹ (اے 1) 100 ملین روپے میں نیلام ہوئی جو مزمل کریم نے سب سے زیادہ بولی لگاکر خریدی تھی۔ سینئر صوبائی وزیر شرجیل انعام میمن نے مزمل کریم کو پلیٹ کا اونرشپ سرٹیفکیٹ دیا تھا۔پریمیئم نمبر پلیٹ 786 چھبیس اعشاریہ پانچ ملین روپے میں نیلام ہوئی جو سروش نامی بزنس مین نے سب سے زیادہ بولی 26 اعشاریہ 5 ملین روپے لگاکر حاصل کی۔ پریمیئم نمبر پلیٹ 7 چھیالیس ملین روپے میں نیلام ہوئی جو مزمل کریم نے سب سے زیادہ بولی 46 ملین روپے لگاکر حاصل کی گئی تھی۔