دنیا میں اتنا بڑا فیسٹیول کبھی نہیں ہوا، آپ سب اس فیسٹیول کے میزبان ہیں، محمد احمد شاہ صدر آرٹس کونسل

آرٹس کونسل آف پاکستان کراچی کے زیر اہتمام 38 روزہ ’’ورلڈ کلچر فیسٹیول کراچی 2024 ‘‘ کے 26ویں روز کامیڈی تھیٹر پلے ’’خوابوں کی نوٹنکی ‘‘ پیش کر دیاگیا

منگل 22 اکتوبر 2024 13:57

کراچی(اُردو پوائنٹ اخبارتازہ ترین - این این آئی۔ 22 اکتوبر2024ء) آرٹس کونسل آف پاکستان کراچی کے زیر اہتمام 38 روزہ ’’ورلڈ کلچر فیسٹیول کراچی 2024 ‘‘ کے 26ویں روز کامیڈی تھیٹر پلے ’’خوابوں کی نوٹنکی ‘‘ پیش کر دیاگیا ، ڈرامہ Suppressed Desire کا ایڈپٹڈ تھا جسے بابر جمال نے تحریر کیا جبکہ ہدایت کاری عظمیٰ سبین کی تھی، ڈرامے کی کاسٹ میں زرقا ناز، اسامہ رانجھااور علینا گلزار نے اپنے اداکاری کے جوہر دکھائے، اس موقع پر صدر آرٹس کونسل محمد احمد شاہ نے کہاکہ ہمارا اتنا بڑا فیسٹیول جاری ہے، بیس سے زیادہ ملک یہاں پر فارم کر چکے ہیں ، آپ تمام لوگ اس فیسٹیول کے میزبان ہیں ، اس ہال میں کرسیوں کے ساتھ سڑھیاں بھی بھری ہوتی ہیں، دنیا میں اتنا بڑا فیسٹیول کبھی نہیں ہوا ، انہوں نے کہاکہ میں بالکل بھی نہیں تھکا، ہسپتال سے سیدھا یہاں آیا ہوں ، اس مرتبہ 25 ممالک ایسے ہیں جو فیسٹیول میں نہیں آسکے ،وہ اگلے سال ضرور یہاں پرفارم کریں گے، ہم نے جب ورلڈ کلچر فیسٹیول کراچی شروع کیا تو 40 ممالک تھے اب ان کی تعداد 45 ہوچکی ہے، ہم نے مرد اور عورت میں کوئی فرق نہیں رکھا، فیسٹیول میں مرد ہدایت کاروں کے ساتھ ساتھ خواتین ہدایت کاروں کو بھی موقع دیا۔

(جاری ہے)

ڈرامے کا دوانیہ 60منٹ تھا جبکہ ڈرامے میں دکھایا گیا کہ اسد اور شیرین جو نفسیاتی تجزیے پر مختلف نظریات رکھتے ہیں، شیرین اپنے آس پاس کے لوگوں کی دبی خواہشات کی تشریح میں مگن ہو جاتی ہے، جیسے جیسے غلط فہمیاں بڑھتی ہیں، شیرین کا نفسیاتی تجزیاتی جذبہ مزاحیہ کشیدگی پیدا کرتا ہے جس سے اسد کی بے چینی بڑھ جاتی ہے، ڈرامے میں اسد اور اس کی بہن ہما اپنی طرف توجہ مرکوز رکھتے ہیں۔ واضح رہے کہ آرٹس کونسل آف پاکستان کراچی میں جاری 38روزہ ورلڈ کلچر فیسٹیول کراچی 02 نومبر تک جاری رہے گا جس کے ٹکٹ آرٹس کونسل کراچی اور ٹکٹ والا ڈاٹ کام سے حاصل کیے جاسکتے ہیں ، آرٹس کونسل کے ممبران 50فیصد رعایت پر آرٹس کونسل سے بآسانی ٹکٹ حاصل کرسکتے ہیں۔