کولگام میں لاپتہ نوجوان کی نعش برآمد،رام بن اور ریاسی میں ٹریفک حادثات میں 4 افراد جاں بحق

بدھ 30 اکتوبر 2024 17:52

سرینگر (اُردو پوائنٹ اخبارتازہ ترین - اے پی پی۔ 30 اکتوبر2024ء) بھارت کے غیرقانونی زیرتسلط جموں وکشمیرمیں ضلع کولگام سے لاپتہ ہونے والے ایک نوجوان کی نعش برآمد ہوئی ہے۔کشمیرمیڈیاسروس کے مطابق27سالہ عادل بشیرجو رعناواری سرینگر کا رہائشی ہے، 30ستمبر 2024سے لاپتہ تھا۔ اس کے گھر والوں نے بتایاکہ وہ کام کے لیے گھر سے نکلا اور واپس نہیں لوٹا۔

اس کی نعش اہرہ بل کے قریب دریاسے برآمد ہوئی۔

(جاری ہے)

گزشتہ ہفتے عادل کے ساتھ لاپتہ ہونے والی خاتون کی نعش دریائے جہلم سے برآمد ہوئی تھی۔ حکام نے تحقیقات کے بعد بتایاکہ لاپتہ ہونے سے قبل دونوں کو ایک گاڑی میں ساتھ دیکھا گیا تھا۔دریں اثنا رام بن اور ریاسی اضلاع میں دو الگ الگ ٹریفک حادثات میں چار لوگوں کی موت ہو گئی اور کئی دیگر زخمی ہوگئے۔ادھر بانڈی پورہ کے علاقے حاجن میں 60سالہ شخص محمد عبداللہ شیخ ٹریکٹر کی زد میں آکرجاں بحق ہوگیا۔ بانڈی پورہ کے ہی علاقے سوناواری میں ایک 14 سالہ لڑکی نے خودکشی کی کوشش کی۔