'یہ ہمارے ہاتھ میں نہیں ہے'، پاکستانی فین کے چیمپئنز ٹرافی کھیلنے آنے کے سوال پر سوریا کمار یادیو کا بے بسی کا اظہار

بھارت نے آئندہ برس فروری میں پاکستان میں ہونیوالی چیمپئنز ٹرافی میں پاکستان نہ آنیکا فیصلہ کیا ہے جبکہ پاکستانی حکومت بھارت کے نہ آنے پر اس سے میچز کے بائیکاٹ کا کہہ چکی ہے

ذیشان مہتاب منگل 12 نومبر 2024 11:16

'یہ ہمارے ہاتھ میں نہیں ہے'، پاکستانی فین کے چیمپئنز ٹرافی کھیلنے آنے ..

لاہور (اردو پوائنٹ تازہ ترین اخبار ۔ 12 نومبر 2024ء ) بھارتی ٹی ٹونٹی ٹیم کے کپتان سوریا کمار یادیو کا پاکستانی فین کی جانب سے چیمپئنز ٹرافی کھیلنے کے لیے پاکستان نہ آنے کے حوالے سے پوچھے گئے سوال پر ردعمل سامنے آیا ہے۔ بھارت نے آئندہ برس فروری میں پاکستان میں ہونے والی چیمپئنز ٹرافی میں پاکستان نہ آنے کا فیصلہ کیا ہے جبکہ پاکستانی حکومت بھارت کے نہ آنے پر اس سے میچز کے بائیکاٹ کا کہہ چکی ہے۔

پاکستان کرکٹ بورڈ نے آئی سی سی چیمپئنز ٹرافی کے لیے اپنی ٹیم نہ بھیجنے کے بھارتی کرکٹ بورڈکے فیصلے پر سخت مؤقف اپناتے ہوئے مائنس انڈیا فارمولے پر غور شروع کر دیا ہے۔ ایسے میں ایک پاکستانی فین نے بھارتی ٹی ٹوئنٹی ٹیم کے کپتان سوریا کمار یادیو جو ان دنوں جنوبی افریقا میں ٹی ٹونٹی سیریز کھیل رہے ہیں، سے چیپمئنز ٹرافی کھیلنے کے لیے بھارتی ٹیم کے پاکستان نہ آنے کی وجہ پوچھ لی۔

(جاری ہے)

سوشل میڈیا پر ایک ویڈیو وائرل ہورہی ہے جس میں سوریا کمار یادیو ساتھی کرکٹر رنکو سنگھ کے ہمراہ بظاہر ایک گیمنگ زون میں کھڑے نظر آرہے ہیں۔ بھارتی کرکٹرز کو دیکھ کر وہاں موجود فینز اکھٹا ہوگئے۔ ایسے میں ایک پاکستانی فین نے سوریا کمار یادیو سے سوال کیا کہ آپ چیمپئنز ٹرافی کیلئے پاکستان کیوں نہیں آرہے؟، جس پر بھارتی کپتان نے جواب دیا کہ ' یہ ہمارے ہاتھ میں نہیں ہے'۔