سرحد چیمبر کاخیبر پختونخوا میں صنعتوں کی ترقی کیلئے کمرشل بینکوں کے ذریعے آسان شرائط پر قرضوں کے اجراء لینڈنگ کی شرح میں اضافے سمیت شرح سود میں سنگل ڈیجیٹ پر لانے کا مطالبہ

پشاور(اُردو پوائنٹ اخبارتازہ ترین - این این آئی۔ 28 نومبر2024ء) سرحد چیمبر آف کامرس اینڈ انڈسٹری کے صدر فضل مقیم خان نے خیبر پختونخوا میں چھوٹے اور درمیانے درجے کے کاروبارو صنعتوں کی ترقی کیلئے کمرشل بینکوں کے ذریعے آسان شرائط پر قرضوں کے اجراء لینڈنگ کی شرح میں اضافے سمیت شرح سود میں سنگل ڈیجیٹ پر لانے کا مطالبہ کیا ہے جبکہ حکومت اور مالیاتی ادارے بزنس فرینڈلی پالیسی اور اقدامات کے ذریعے خیبر پختونخوا میں معاشی سرگرمیوں اور صنعتوں کی بحالی کے لئے اپنا کردار ادا کرے تاکہ صوبے میں روزگار کے زیادہ سے زیادہ مواقع پیدا کئے جاسکیں اور ملک و صوبے کی معیشت و عوام خوشحالی اور ترقی کی راہ پر گامزن ہوسکے۔

ان خیالات کا اظہار انہوں نے گذشتہ روز سرحد چیمبر آف کامرس اینڈ انڈسٹری اور اسٹیٹ بینک آف پاکستان پشاور زون کے اشتراک سے اسلامک بینک کاری کے موضوع پر منعقدہ آگاہی سیشن کے دوران خطاب کرتے ہوئے کیا۔

(جاری ہے)

سیمینار میں سرحد چیمبر کے سینئر نائب صدر عبدالجلیل جان ،ْ نائب صدر شہریار خان ،ْ اسٹیٹ بینک آف پاکستان پشاور چیف منیجر وقار علی ،ْ دی بینک آف خیبر پختونخوا کے بورڈ ممبر اور نامور سکالر قاضی عبدالصمد ،ْ سرحد چیمبر کے سابق صدر فواد اسحق ،ْ سرحد چیمبر کی ایگزیکٹو کمیٹی کے اراکین آفتاب اقبال ،ْ محمد اشفاق ،ْ سیف اللہ خان ،ْ ندیم رئوف ،ْ سابق سینئر نائب صدر عمران خان مہمند اور ،ْ عبدالماجد ،ْ سید اعجاز علی شاہ ،ْ فیروز شاہ ،ْ مظہر الحق ،ْ عاطف خواجہ ،ْ زاہد سلطان ایڈووکیٹ ،ْ راشد اقبال صدیقی اور سرحد چیمبر کے سیکرٹری جنرل مقتصد احسن کے علاوہ مختلف کمرشل بینکوں کے منیجرز اور نمائندوں نے کثیر تعداد میںشرکت کی۔

سیمینار کے دوران دی بینک کے شریعہ بورڈ کے ممبر اور اسکالر قاضی عبدالصمد نے اسلامک بینک کاری کے حوالے سے شرکاء کو تفصیلی طور پر آگاہ کیا جبکہ اسٹیٹ بینک آف پاکستان کے چیف منیجر وقار علی نے اس موقع پر ابتدائی کلمات میں اسلامک بینک کاری کے حوالے سے شعور و آگاہی پیدا کرنے کے بارے میں اقدامات پر روشنی ڈالی۔ انہوں نے کہا کہ اسٹیٹ بینک ریگولری ،ْ شریعہ گورننس ،ْ آئوٹ ریج آف مارکیٹ ،ْ ڈویلپمنٹ ،ْ فریم ورکس اور بیسک آگاہی اور یورنیورسٹیز / تعلیمی اداروں کے ساتھ مل کر مختلف پروگراموں کے انعقاد اور دیگر اقدامات اٹھا رہا ہے۔

اسٹیٹ بینک آف پاکستان کے سینئر افسر نے موجودہ دور میں اسلامک بینک کاری کی اہمیت اور افادیت کو سیمینار کے دوران اجاگر کیا۔ سرحد چیمبر کے صدر فضل مقیم خان نے کہا کہ کمرشل بینکوں کی جانب سے لینڈنگ کی شرح کے مقابلے میں ڈیپازٹ میں بتدریج اضافہ پر تشویش کا اظہار کیا اور کہا کہ کمرشل بینکوں نے خیبر پختونخوا کو ریڈزون میں ڈالا ہوا ہے جو کہ صوبے کی عوام اور کاروباری طبقہ کے ساتھ امتیازی سلوک کے مترادف ہے ۔

انہوں نے کہا کہ خیبر پختونخوا میں قرضوں کی شرح نہ ہونے کے برابر ہے ۔ انہوں نے اس بات پر زور دیتے ہوئے کہا ہے کہ خیبر پختونخوا میں معاشی و صنعتی سرگرمیوں کے فروغ کے لئے چھوٹے پیمانے پر قرضوں کے اجراء کی اشد ضرورت ہے۔ سرحد چیمبر کے صدر فضل مقیم خان ،ْ سینئر نائب صدر عبدالجلیل جان اور شہریار خان نے کمرشل بینکوں کی جانب سے بزنس کمیونٹی کوقرضوں کے اجراء میں رکاوٹوں کی نشاندہی کرتے ہوئے مطالبہ کیا کہ قرضوں کی فراہمی کیلئے نظام و طریقہ کار کو سہل بنایا جائے ۔

انہوں نے رننگ فنانس ،ْIDBP کی بحالی اور شرح سود کو سنگل ڈیجیٹ پر لانے کا مطالبہ کیا ہے ۔ قبل ازیں سرحد چیمبر کے سابق صدر فواد اسحق ،ْ ایگزیکٹو ممبران اور بزنس کمیونٹی کے ممبران نے بھی خطاب کیا اور اسلامک بینک کاری کی اہمیت کو اجاگر کیا۔