وزیرتعلیم سکولز آزاد کشمیر دیوان علی خان چغتائی نے آزاد کشمیر میں ''پرائم منسٹر نیشنل مائنڈ سپورٹس انشیٹو'' پروگرام کا آغاز کر دیا

مظفرآباد (اُردو پوائنٹ اخبارتازہ ترین - اے پی پی۔ 29 نومبر2024ء) وزیر تعلیم سکولز آزاد کشمیر دیوان علی خان چغتائی، چیف سیکرٹری دائود محمد بڑیچ نے چیئرمین چیس فیڈریشن آف پاکستان حنیف قریشی کے ہمراہ آزاد کشمیر میں ''پرائم منسٹر نیشنل مائنڈ سپورٹس انشیٹو'' پروگرام کا فیتہ کاٹ کر آغاز کر دیا ہے۔ اس موقع پر سیکرٹری سپورٹس، یوتھ اینڈ کلچر راشد حنیف، ڈائریکٹر جنرل سپورٹس، یوتھ اینڈ کلچر ملک شوکت حیات خان، چیئرمین چیس فیڈریشن آف پاکستان حنیف قریشی، انٹرنیشنل چیس ٹرینر مس ریٹا اٹکنز اور انٹرنیشنل چیس چیمپئن مس انزل لانچر بھی موجود تھیں۔

محکمہ ایلیمنٹری اینڈ سکینڈری ایجوکیشن اور سپورٹس، یوتھ اینڈ کلچر کے زیر انتظام چس فیڈریشن آف پاکستان کی جانب سے ''FIDE EDU IN PERSON TRAINING'' کی لانچنگ سرمنی کا انعقاد کیا گیا۔

(جاری ہے)

وزیر تعلیم سکولز دیوان علی خان چغتائی نے آزاد کشمیر میں نیشنل مائنڈ پورٹس انشیٹو کے آغاز کا خیر مقدم کرتے ہوئے کہا کہ نصابی سرگرمیوں کے ساتھ غیر نصابی سرگرمیوں کے فروغ کیلئے ہر ممکن اقدامات اٹھائے گی۔

آزاد کشمیر کے طلبہ کو نیشنل مائنڈ سپورٹس انشیٹو کے تحت سیکھنے کے مواقع فراہم کریں گے۔ انہوں نے چیس فیڈریشن آف پاکستان اور بین الاقوامی چیس ٹرینرز کا شکریہ ادا کرتے ہوئے ہر ممکن تعاون فراہم کرنے کی یقین دہانی بھی کرائی۔ چیف سیکرٹری آزاد کشمیر داؤد محمد بڑیچ نے لانچنگ سرمنی سے خطاب کرتے ہوئے کہا کہ آزاد کشمیر میں مائنڈ سپورٹس انشیٹو کا آغاز خوش آئند ہے۔

آزاد کشمیر میں بے پناہ پوٹینشل موجود ہے یہاں کے بچے انتہائی ذہین ہیں جو بین الاقوامی سطح پر ہر قسم کے کھیلوں میں ملک کا نام روشن کریں گے۔ حکومت نوجوانوں کو مائنڈ سپورٹس کے مواقع فراہم کرنے کے لیے چیس فیڈریشن آف پاکستان کودرکار تعاون فراہم کرے گی۔ اس سے پہلے بین الاقوامی اور قومی چیس ماسٹرز نے آزاد کشمیر کے تعلیمی اداروں سے شریک 40 سے زائد طلبہ کے ساتھ شطرنج کھیلی اور ان کی رہنمائی بھی کی۔

بیکن ہاوس مظفرآباد سے آٹھویں گریڈ کے ہونہار بچے حذیفہ نعمان اور ابراہیم عامر نے بہترین کھیل پیش کرتے ہوئے شطرنج کی بازی اپنے نام کی۔وزیر تعلیم سکولز دیوان علی خان چغتائی، چیف سیکرٹری داود محمد بڑیچ نے ٹریننگ میں شریک بچوں کی حوصلہ افزائی کی اور ان کے تاثرات لئے۔ چیئرمین چیس فیڈریشن آف پاکستان نے نیشنل مائنڈ سپورٹس انشیٹو پروگرام جبکہ انٹرنیشنل ٹرینر مس ریٹا اٹیکنز نے چیس کھیل کی تعلیم اور ضرورت کے حوالے سے تفصیلی بریفنگ دی۔

سیکرٹری سپورٹس، یوتھ اینڈ کلچر راشدحنیف نے شرکاء کا شکریہ ادا کرتے ہوئے کہا کہ غیر نصابی سرگرمیوں کو نصاب کا حصہ بنانے کی ضرورت ہے۔ انہوں نے آزاد کشمیر کے سکول کو پائلٹ پراجیکٹ کا حصہ بنانے کی تجویز دی۔ ٹریننگ میں شریک طلبہ نے آزاد کشمیر میں پروگرام کے آغاز کا خیر مقدم کرتے ہوئے کہا کہ اسطرح کے مواقع سے ہمیں آگے بڑھنے کا حوصلہ ملا ہے اور بین الاقوامی ٹرینرز کے ساتھ شطرنج کھیل کر انتہائی خوشی ہوئی ہے۔تقریب میں ڈسٹرکٹ ایجوکیشن آفیسر نسواں سیدہ درشہوار نقوی، ڈپٹی سیکرٹری سپورٹس یوتھ اینڈ کلچر سیدہ رابعہ نقوی، ڈپٹی ڈائریکٹر سکولز سید احمد حسن و دیگر بھی موجود تھے۔