جسٹس (ر) شوکت عزیز صدیقی نیشنل انڈسٹریل ریلیشنز کمیشن کے چیئرمین مقرر

جوڈیشل کمیشن لاہور ہائی کورٹ میں اضافی ججز کی تعیناتی کے لیے 7 وکلا کے ناموں پر غور کرے گا.رپورٹ

میاں محمد ندیم منگل 3 دسمبر 2024 13:55

جسٹس (ر) شوکت عزیز صدیقی نیشنل انڈسٹریل ریلیشنز کمیشن کے چیئرمین مقرر

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔03 دسمبر۔2024 ) جسٹس (ریٹائرڈ) شوکت عزیز صدیقی کو نیشنل انڈسٹریل ریلیشنز کمیشن (این آئی آر سی) کا چیئرمین مقرر کردیا گیا ہے رپورٹ کے مطابق جوڈیشل کمیشن آف پاکستان (جے سی پی) لاہور ہائی کورٹ میں اضافی ججز کی تعیناتی کے لیے 7 وکلا کے ناموں پر غور کرے گا. یاد رہے کہ سپریم جوڈیشل کونسل نے انٹر سروسز انٹیلی جنس (آئی ایس آئی) کے سابق سربراہ جنرل (ر) فیض حمید پر تنقید اور عدلیہ میں مداخلت کا الزام عائد کرنے پر جسٹس شوکت عزیز صدیقی کو عہدے سے برطرف کردیا تھا رواں سال کے اوائل میں سپریم کورٹ آف پاکستان نے سپریم جوڈیشل کونسل کے احکامات کو کالعدم قرار دے دیا تھا.

(جاری ہے)

جسٹس صدیقی نے ریٹائرمنٹ کے بعد کے فوائد اور پنشن کا بھی دعویٰ کیا جس پر حکومت نے ان کے تمام بقایا جات جاری کردیے وفاقی کابینہ نے گزشتہ روز جسٹس ریٹائرڈ شوکت صدیقی کی 3 سال کی مدت کے لیے بطور چیئرمین این آئی ار سی منظوری دی تھی اس کے علاوہ ایڈووکیٹ مصباح اللہ خان اور حماد حسن رندھاوا کو کمیشن کا رکن مقرر کیا گیا ہے. این آئی آر سی 1972 میں انڈسٹریل ریلیشن آرڈیننس 1969 میں ترمیم کے ذریعے قائم کیا گیا تھا جس کو انڈسٹری کے ٹریڈ یونین اور قومی سطح کے ٹریڈ یونین اور فیڈریشنز کے رجسٹریشن کے مسائل حل کرنے کا اختیار دیا گیا تھا بعد ازاں کمیشن کو تمام اداروں میں غیر منصفانہ لیبر پریکٹس کے معاملوں کو اٹھانے کی ذمہ داری سونپی گئی.

لاہور ہائی کورٹ میں ایڈیشنل ججز کے عہدے کے لیے 7 وکلا کی نامزدگی پر غور کے لیے جوڈیشل کمیشن آف پاکستان (جے سی پی) کا اجلاس طلب کرلیا گیا جے سی پی کے 7 دسمبر کو ہونے والے اجلاس کے ایجنڈے کے مطابق لاہور ہائی کورٹ کے ایڈیشنل ججز کی تعیناتی کے لیے ایڈووکیٹ محمد صدیقی اعوان، علی مسعود حیات، حسن نواز مخدوم، عامر عجم ملک، ضیا الرحمان، محمد جواد ظفر اور ملک محمد اویس خالد کے ناموں پر غور کیا جائے گا.