مقبوضہ کشمیر میں سات لاکھ فوج کے باوجود پہلگام کا واقعہ ہونا مودی سرکار کی ناکامی کا منہ بولتا ثبوت ہے‘عظمیٰ بخاری

لاہور (اُردو پوائنٹ اخبارتازہ ترین - این این آئی۔ 30 اپریل2025ء) وزیر اطلاعات پنجاب عظمیٰ بخاری نے کہا ہے کہ مقبوضہ کشمیر میں سات لاکھ فوج کے باوجود پہلگام کا واقعہ ہونا مودی سرکار کی ناکامی کا منہ بولتا ثبوت ہے، افضل گرو سے پہلگام تک بھارت کا ہر الزام بے نقاب ہوا، آج بھی ثبوت دینے سے قاصر ہے،انڈیا ہمیشہ پاکستان کے خلاف جھوٹا بیانیہ بنانے میں پیش پیش رہا ہے، سمجھوتہ ایکسپریس، پٹھان کوٹ اور پلوامہ جیسے واقعات میں بھارت کوئی ثبوت فراہم نہ کر سکا۔

ان خیالات کا اظہار انہوں نے ڈی جی پی آر میں پریس کانفرنس کرتے ہوئے کیا۔انہوں نے کہا کہ گزشتہ دنوں ڈی جی آئی ایس پی آر نے واضح شواہد کے ساتھ بھارت کے اندرونی دہشتگرد عناصر کو بے نقاب کیا ہے۔بھارتی آرمی جنرلز خود اعتراف کر چکے ہیں کہ بھارت کے کئی حملے خود ساختہ اور جھوٹے تھے۔

(جاری ہے)

پاکستانی قوم اور افواج کے حوصلے بلند ہیں۔ جعفر ایکسپریس اور دیگر مسائل پر قوم کو حقائق سے جلد آگاہ کیا جائے گا۔

کل دشمن کی مشقیں ملتوی ہو گئیں کیونکہ جیسے ہی پاکستانی شاہین فضا میں بلند ہوئے، ان کا ارادہ بدل گیا۔انہوں نے کہا کہ پاکستانی فوج وردی صرف تنخواہ کے لیے نہیں پہنتی، بلکہ ملک و قوم کے لیے ہر وقت قربانی دینے کے لیے تیار رہتی ہے۔ دشمن کی ہر سازش ناکام ہوگی اور پاکستان ہر انچ زمین کی حفاظت کرنا جانتا ہے۔وزیر اطلاعات نے کہا کہ لاہور کو حالیہ دنوں میں عالمی سطح پر ایک بڑی کامیابی حاصل ہوئی ہے، جہاں اسے دنیا کے محفوظ ترین شہروں میں شامل کیا گیا ہے۔

لاہور کو نیویارک اور سڈنی سے زیادہ صاف شہر قرار دیا جا رہا ہے اور جون تک باقی سیف سٹی منصوبے مکمل ہونے کے بعد پورا پنجاب محفوظ ترین خطہ بن جائے گا۔نمبیو (Numbeo)کرائم اینڈ سیفٹی انڈیکس کے مطابق لاہور میں جرائم کی شرح میں 50 فیصد کمی ریکارڈ کی گئی ہے، جب کہ ڈکیتی اور قتل جیسے سنگین جرائم میں 64 فیصد کمی واقع ہوئی ہے۔انہوں نے واضح کیا کہ یہ سرکاری دعوے نہیں بلکہ عالمی سطح پر تسلیم شدہ ڈیٹا کا نتیجہ ہے۔

وزیراعلی پنجاب مریم نواز نے لاہور پولیس کو اس کامیابی پر شاباش دی ہے اور آئندہ بھی امن و امان کے قیام کے لیے بھرپور اقدامات کا اعادہ کیا ہے۔عظمی بخاری نے کہا کہ ماضی میں صرف نعرے لگائے جاتے تھے کہ پولیس کو غیر سیاسی بنایا جائے گا، لیکن موجودہ حکومت نے عملی اقدامات کیے۔ سیف سٹیز پراجیکٹ کی کامیابی اسی کا عملی ثبوت ہے، اور جون 2025 تک یہ منصوبہ پنجاب کے تمام بڑے شہروں میں مکمل کر لیا جائے گا۔

جنوبی پنجاب اور بارڈر ایریاز میں پولیس کو سیفٹی کا جدید سامان فراہم کیا گیا ہے، جو پہلے دستیاب نہیں تھا۔ گزشتہ ایک سال میں 400 سے زائد پولیس اہلکاروں کے خلاف کارروائیاں کی گئیں، جن میں کرپشن اور نااہلی پر سزائیں بھی شامل ہیں۔وزیر اطلاعات نے بتایا کہ وزیراعلی پنجاب آج طلبا میں لیپ ٹاپ اسکیم کے تحت لیپ ٹاپ تقسیم کریں گی، جبکہ "صاف چلی، شفاف چلی" اسکیم پاکستان کی تاریخ کی سب سے بڑی شفاف گورننس مہم بن کر ابھری ہے۔