احساس اپنا گھر سکیم کیلئے محکمہ ہاؤسنگ اور بینک آف خیبر کے درمیان یاداشت پر دستخط

پشاور ( اُردو پوائنٹ اخبارتازہ ترین۔ 04 دسمبر 2024ء ) خیبرپختونخواہ حکومت کی ’احساس اپنا گھر‘ سکیم کیلئے محکمہ ہاؤسنگ اور بینک آف خیبر کے درمیان یاداشت پر دستخط ہوگئے۔ صوبائی حکومت کی پریس ریلیز کے مطابق صوبے کے کم آمدن والے افراد کو معیاری رہائش کی فراہمی کے لیے خیبر پختونخواہ حکومت نے احسن اقدام اٹھایا ہے جس کے تحت ”احساس اپنا گھر“ سکیم پر عمل درآمد کے لیے محکمہ ہاؤسنگ اور بینک آف خیبر کے درمیان مفاہمتی یاداشت پر دستخط ہوئے، مفاہمت کی یادداشت پر دستخط کی تقریب وزیراعلیٰ ہاوس میں منعقد ہوئی، وزیراعلیٰ علی امین گنڈاپور تقریب کے مہمان خصوصی تھے، صوبائی کابینہ اراکین ڈاکٹر امجد علی خان اور مشیر خزانہ مزمل اسلم کے علاوہ متعلقہ محکموں اور دی بینک آف خیبر کے حکام نے تقریب میں شرکت کی۔

(جاری ہے)

بتایا گیا ہے کہ سکیم پر 4 ارب روپے کی لاگت آئے گی، سکیم کے تحت کم آمدن والے افراد کو نئے گھر کی تعمیر یا موجودہ گھر کی توسیع و مرمت کیلئے 15 لاکھ روپے تک کے بلا سود قرضے دیئے جائیں گے، قرضوں کی واپسی کیلئے 7 سالوں پر مشتمل آسان شیڈول تجویز کیا گیا ہے، قرض واپسی کی ماہانہ قسط زیادہ سے زیادہ 18 ہزار روپے تک ہوگی، یہ سکیم ریوالونگ فنڈز سسٹم کے تحت آئندہ 7 سالوں تک جاری رہے گی، اس سکیم کے تحت قرضوں کے حصول کے لیے اپنی ملکیتی زمین کا ہونا ضروری ہے۔

وزیراعلیٰ خیبرپختونخواہ کا کہنا ہے کہ لوگوں کو رہائش کی معیاری سہولیات کی فراہمی موجودہ صوبائی حکومت کی ترجیحات میں شامل ہے، ”احساس اپنا گھر“ سکیم کا اجراء اس سلسلے کی ایک اہم کڑی ہے، یہ موجودہ صوبائی حکومت کا ایک اور فلاحی منصوبہ ہے، اس پروگرام کے تحت صوبے کے کم آمدنی والے لوگوں کو معیاری رہائشی سہولیات فراہم کرنے کے لیے بلاسود قرضے فراہم کیے جائیں گے، اس پروگرام پر عمل درآمد سے ناصرف کم آمدنی والے لوگوں کو رہائش کی معیاری سہولیات فراہم ہوں گی بلکہ ان کے سماجی اور معاشی حالات کو بہتر بنانے میں بھی مدد ملے گی۔

علی امین خان گنڈاپور نے متعلقہ حکام کو ہدایت کی کہ سکیم کے تحت بلاسود قرضوں کی فراہمی کے عمل میں شفافیت کو ہر لحاظ سے یقینی بنایا جائے، اس بات کو یقینی بنایا جائے کہ یہ قرضے صرف حقدار لوگوں کو ملیں، احساس پروگرام کے تحت صوبائی حکومت نے دیگر فلاحی منصوبے بھی شروع کیے ہیں، ان منصوبوں میں احساس نوجوان، احساس ہنر اور احساس روزگار شامل ہیں۔