چیمپئنز ٹرافی: میزبان ملک پاکستان کے حالات کھیلوں اور بھارت کیلئے سازگار نہیں: انوراگ ٹھاکر

جب تک پاکستان دہشت گردانہ سرگرمیوں اور سرحد پار سے ہونے والی سرگرمیوں پر قابو نہیں کرتا ہندوستانی ٹیم دورہ نہیں کرے گی : بھارتی وزیر کھیل

ذیشان مہتاب جمعہ 6 دسمبر 2024 11:41

چیمپئنز ٹرافی: میزبان ملک پاکستان کے حالات کھیلوں اور بھارت کیلئے سازگار ..

لاہور (اردو پوائنٹ تازہ ترین اخبار ۔ 6 دسمبر 2024ء ) پاکستان کی میزبانی میں ہونے والی آئی سی سی چیمپئنز ٹرافی میں بھارتی ٹیم کی آمد سے متعلق اسپورٹس منسٹر انوراگ ٹھاکر کا بیان سامنے آگیا۔

ہندو انتہا پسند جماعت بھارتیہ جنتا پارٹی (بی جے پی) کے رکن پارلیمنٹ اور اسپورٹس منسٹر انوراگ ٹھاکر کا کہنا ہے کہ چیمپئنز ٹرافی کے میزبان ملک پاکستان کے حالات کھیلوں اور بھارت کےلیے سازگار نہیں ہیں۔

بھارتی وزیر کھیل نے ایک مرتبہ پھر کھیل کو سیاست سے جوڑتے ہوئے ٹیم کو پاکستان نہ بھیجنے کا مقصد کھلاڑیوں کی حفاظت قرار دیا اور کہا کہ جب تک پاکستان دہشت گردانہ سرگرمیوں اور سرحد پار سے ہونے والی سرگرمیوں پر قابو نہیں کرتا ہندوستانی ٹیم دورہ نہیں کرے گی۔

ادھر چیمپئنز ٹرافی میں بھارتی ٹیم کی عدم شرکت اور ہائبرڈ ماڈل کے معاملے پر پاکستان نے بھارتی بورڈ اور آئی سی سی کو گھٹنوں پر لاکھڑا کیا ہے۔

(جاری ہے)

چیئرمین پی سی بی نے دوٹوک موقف رکھا ہے کہ اگر بھارت پاکستان نہیں آیا تو آئندہ آئی سی سی ایونٹس میں پاکستان بھی بھارت کے بجائے اپنے میچز دبئی میں کھیلے گا۔

ادھر بھارتی میڈیا رپورٹس کے مطابق انڈین کرکٹ بورڈ (بی سی سی آئی) نے پاکستان کے ہائبرڈ ماڈل پر رضامندی ظاہر کردی اور اپنے فیصلے سے آئی سی سی کو بھی آگاہ کردیا ہے، چیمپئنز ٹرافی کا حتمی اعلان انٹرنیشنل کرکٹ کونسل (آئی سی سی) کی جانب سے 7 دسمبر کو ہوگا۔

بھارت اپنے میچز تیسرے مقام (نیوٹرل وینیو) پر کھیلے گا، اسی طرح ہائبرڈ ماڈل کے تحت 2027ء تک بھارت پاکستان کا دورہ نہیں کرے گا جبکہ پاکستان بھی اس دوران بھارت میں اپنا کوئی میچ نہیں کھیلے گا۔