ایف بی آر کا بیرون ممالک سے آنے والے مسافروں پر بڑی پابندی عائد کرنے کا فیصلہ

بیرون ملک سے آنیوالے مسافر کو 1200 ڈالرز سے زائد مالیت کی اشیا ساتھ لانے کی اجازت نہیں ہو گی

محمد علی پیر 9 دسمبر 2024 21:00

لاہور(اُردو پوائنٹ اخبارتازہ ترین۔ 09 دسمبر2024ء) ایف بی آر کا بیرون ممالک سے آنے والے مسافروں پر بڑی پابندی عائد کرنے کا فیصلہ، بیرون ملک سے آنیوالے مسافر کو 1200 ڈالرز سے زائد مالیت کی اشیا ساتھ لانے کی اجازت نہیں ہو گی۔ تفصیلات کے مطابق ایف بی آر کی جانب سے بیرون ممالک سے پاکستان آنے مسافروں پر اپنے ساتھ لانے والے سامان بشمول موبائل فونز کی تعداد کو محدود کرنے کا فیصلہ کیا گیا ہے۔

میڈیا رپورٹس کے مطابق ایف بی آر کے تازہ ترین فیصلے کے تحت بیرون ممالک سے آنے والے افراد ایسی اشیاء جو کمرشل کیٹیگری میں آتی ہوں، انہیں ایک مخصوص حد سے زیادہ اپنے ساتھ پاکستان نہیں لا سکیں گے۔ بیرون ممالک سے پاکستان آنے والے ایسے افراد جو مقرر کردہ حد سے زیادہ کمرشل کیٹیگری میں آنے والی اشیاء اور موبائل فون اپنے ساتھ لائے تو ائیرپورٹ پر تمام زائد اشیاء ضبط کر لی جائیں گی۔

(جاری ہے)

ایف بی آر نے بیگج اسکیم کے تحت بیرون ممالک سے پاکستان آنے والے مسافروں کو اپنے ساتھ کمرشل مقدار میں اشیا لانے پر پابندی عائد کرنے کا فیصلہ کیا ہے، اس فیصلے کے تحت 1200 ڈالر سے زائد مالیت کی اشیا کمرشل ٹریڈنگ تصور کی جائے گی۔ ایف بی آر نے بیگج رولز 2006 میں ترامیم کا مسودہ تیار کر کے اسٹیک ہولڈرز سے آراء کے لیے جاری کردیا ہ،ے مجوزہ رولز کے بارے میں 7 دن کے اندر اندر آراء و تجاویز دی جاسکتی ہیں، مقررہ معیاد کے بعد موصول ہونے والی تجاویز و آراء کو قبول نہیں کیا جائے گا۔

مقررہ معیاد تک آراء و تجاویز موصول نہ ہونے پر گزٹ نوٹیفکیشن کے ذریعے مجوزہ رولز لاگو کر دیے جائیں گے۔ ایف بی آر کی بیگج اسکیم کے تحت بیرون ممالک سے پاکستان آنے والوں کو اپنے ذاتی استعمال کے لیے صرف ایک موبائل فون ساتھ لانے کی اجازت ہوگی، مجوزہ رولز میں کہا گیا ہے کہ ایک فون کے علاوہ باقی جو بھی موبائل فون ہوں گے وہ ضبط کر لیے جائیں گے۔ بیگج اسکیم کے تحت 1200 ڈالر سے زائد مالیت کی اشیا ساتھ لانے والے مسافروں کی اشیا مستقل طور پر ضبط کر لی جائیں گی، یہ اشیاء ڈیوٹی و ٹیکسوں اور جرمانوں کی ادائیگی پر بھی کلیئر نہیں کی جائیں گی۔