پٹرول مزید مہنگا ہونے کا امکان

عالمی مارکیٹ میں تیل کی قیمتوں میں اضافہ ہونے کی وجہ سے پاکستان میں بھی 16 دسمبر سے پٹرولیم مصنوعات کی قیمتوں میں اضافہ ہونے کا امکان

محمد علی جمعہ 13 دسمبر 2024 21:58

لاہور ( اردوپوائنٹ اخبار تازہ ترین ۔ 13 دسمبر 2024ء ) پٹرول مزید مہنگا ہونے کا امکان، عالمی مارکیٹ میں تیل کی قیمتوں میں اضافہ ہونے کی وجہ سے پاکستان میں بھی 16 دسمبر سے پٹرولیم مصنوعات کی قیمتوں میں اضافہ ہونے کا امکان۔ تفصیلات کے مطابق عالمی منڈی میں تیل کی قیمتوں میں پھر سے اضافے کا رجحان دیکھا جا رہا ہے۔ برطانوی خام تیل 73.66 ڈالر فی بیرل کی سطح پر پہنچ گیا۔

جبکہ امریکی خام تیل کی قیمت 6 سینٹ بڑھ کر 70.35 ڈالر ہوگئی۔ میڈیا رپورٹس کے مطابق عالمی منڈی کے زیراثر ملک میں بھی پٹرولیم مصنوعات کی قیمتوں میں مزید اضافے کا امکان ہے۔ اگلے 15 روز کے لیے پٹرول کی قیمت میں 0.81 روپے فی لیٹر اضافہ جبکہ ڈیزل کی قیمت میں 3.94 روپے فی لیٹر کمی کی توقع ظاہر کی جارہی ہے۔ واضح رہے کہ وفاقی حکومت نے 30 نومبر کو پیٹرولیم مصنوعات کی قیمتوں میں اضافے کا اعلان کیا تھا۔

(جاری ہے)

وفاقی وزارت خزانہ سے جاری نوٹیفکیشن کے مطابق پیٹرول کی قیمت میں 3 روپے 72 پیسے جبکہ ہائی اسپیڈ ڈیزل کی قیمت میں 3 روپے 29 پیسے اضافہ کیا گیا تھا۔ پٹرولیم مصنوعات کی نئی قیمتوں کا اعلان 15 دسمبر کو کیا جائے گا۔