کراچی،یونیورسٹی روڈ پر پانی کی لائن کا مرمتی کام 95 فیصد مکمل

دھابیجی پمپنگ اسٹیشن سے شہر تک پانی پہنچنے میں 14 گھنٹے لگتے ہیں،ترجمان واٹرکارپوریشن

جمعرات 19 دسمبر 2024 17:33

کراچی (اُردو پوائنٹ اخبارتازہ ترین - این این آئی۔ 19 دسمبر2024ء)کراچی میں یونیورسٹی روڈ پر پانی کی لائن کا مرمتی کام 95 فیصد مکمل کر لیا گیا۔ترجمان واٹر کارپوریشن کے مطابق یونیورسٹی روڈ پر پانی کی لائن کا مرمتی کام آخری مراحل میں ہے جو جلد مکمل کر لیا جائے گا، احتیاطی طور پر لائن کی مزید مضبوطی کے لیے ایکسٹرا کالر لگائے جا رہے ہیں۔

(جاری ہے)

ترجمان کا بتانا ہے کہ مستقبل میں لائن کو نقصان سے بچانے کے لیے اضافی کالر لگائے جا رہے ہیں، مسلسل 32 گھنٹے لائن کی ویلڈنگ اور کنکریٹ کا کام بھی مکمل کر لیا گیا ہے۔

ان کا بتانا ہے کہ مرمتی کام مکمل کرنے کے فوری بعد دھابیجی پمپنگ اسٹیشن سے پانی کی فراہمی شروع کر کے لائنوں کو چارج کیا جائے گا، ڈان اسٹریم کینجھر جھیل دریائے سندھ سے پانی کی سطح بڑھا دی گئی ہے۔ترجمان کے مطابق دھابیجی پمپنگ اسٹیشن سے شہر تک پانی پہنچنے میں 14 گھنٹے لگتے ہیں، جلد شہر میں پانی کی فراہمی بحال ہونا شروع ہو جائے گی۔