ٴْسینیٹ اجلاس میں سینیٹر کا امریکا کی پاکستانی اداروں پر پابندی کا معاملہ اٹھانے کا مطالبہ

جمعرات 19 دسمبر 2024 19:00

y اسلام آباد(اُردو پوائنٹ اخبارتازہ ترین - آن لائن۔ 19 دسمبر2024ء)جمعیت علمائے اسلام (جے یو آئی ف) کے سینیٹر کامران مرتضیٰ نے چیئرمین سینیٹ یوسف رضا گیلانی سے مطالبہ کیا ہے کہ آج ایوان بالا کے اجلاس کے دوران یونان میں ہونے والے کشتی حادثے اور امریکا کی جانب سے پاکستان کے 4 اداروں پر عائد کردہ پابندیوں کا معاملہ اٹھایا جائے۔چیئرمین سینیٹ یوسف رضا گیلانی کی زیر صدارت ملک کے ایوان بالا کا اجلاس جاری ہے جس میں جے یو آئی (ف) کے سینیٹر کی جانب سے یہ مطالبہ کیا گیا۔

اجلاس کے دوران صحافیوں نے پری وینشن آف الیکٹرانک کرائمز (پیکا) قانون کے تحت کیسز پر احتجاجاً واک آؤٹ کیا، صحافی برادری کا کہنا تھا کہ پیکا قانون کے تحت ہمارے خلاف مقدمات درج کیے جانے کا سلسلہ بند ہوناچاہیے۔

(جاری ہے)

چیئرمین سینیٹ نے اجلاس سے صحافیوں کے واک آؤٹ کا نوٹس لیا جس کے بعد سینیٹر سلیم مانڈی والا، سینیٹر عون عباس اور سینیٹر حاجی ہدایت اللہ پریس روم پہنچ گئے اور صحافیوں کو منانے کی کوشش کی۔

سینیٹر عون عباس نے تجویز دی کہ معاملے پر ایک تین رکنی کمیٹی بنادیں، وزیر قانون اعظم نذیر تارڑ نے کہاکہ اجلاس کے بعد صحافی برادری ملاقات کے لیے آجائے، اس پر بات کرلیتے ہیں، میں وزیر اطلاعات عطا تارڑ سے بھی معاملہ پر بات کرلیتا ہوں۔اجلاس کے دوران جے یو آئی (ف) کے سینیٹر کامران مرتضیٰ نے چیئرمین سینیٹ یوسف رضا گیلانی سے مطالبہ کیا کہ یونان میں ہونے والے کشتی حادثے اور امریکا کی جانب سے پاکستان کے 4 اداروں پر عائد کردہ پابندیوں کا معاملہ اٹھایا جائے۔کامران مرتضی نے کہا کہ ایوان میں ان دونوں معاملات پر گفتگو کی جائے، یونان کشتی کے ذمہ داروں کو بددعائیں دینے کا دل کرتا ہے، اس پر چئیرمین سینیٹ نے کہا کہ دونوں معاملات پر وقفہ سوالات کے بعد گفتگو ہوگی۔