’’انسدادچائلڈلیبرڈے‘‘

بچوں کے ہاتھ میں قلم،کتاب اورلیپ ٹاپ ہونے چاہئیں،اوزاراوراینٹیں نہیں‘مریم نواز

جمعرات 12 جون 2025 21:55

لاہور(اُردو پوائنٹ اخبارتازہ ترین - این این آئی۔ 12 جون2025ء)وزیر اعلیٰ پنجاب مریم نواز شریف نے کہا کہ بچوں کے محفوظ مستقبل کیلئے پنجاب چائلڈ پروٹیکشن پالیسی نافذ کرنے والا پہلا صوبہ ہے۔ پنجاب میں پہلا ورچوئل چائلڈ سیفٹی سٹیشن قائم کر کے بچوں کے حقوق کا تحفظ یقینی بنارہے ہیں۔ وزیراعلیٰ مریم نواز شریف نے بچوں سے جبری مشقت کے انسداد کے عالمی دن پر اپنے پیغام میں کہا کہ چائلڈ لیبر قطعاً برداشت نہیں،بچے میری ریڈ لائن ہیں۔

آج کے دور میں چائلڈ لیبر کے واقعات انسانیت کے لئے المیہ ہے۔بچوں سے جبری مشقت،معاشرے کے باشعورشہریوں کیلئے لمحہ فکریہ ہے۔وزیراعلیٰ مریم نواز شریف نے کہا کہ بچوں کے ہاتھ میں قلم،کتاب اورلیپ ٹاپ ہونے چاہئیں،اوزاراوراینٹیں نہیں۔قلم تھامنے والی کم سنی کی عمر میں بوجھ اٹھانے پر مجبور بچے ہر مہذب معاشرے کیلئے سوالیہ نشان ہیں۔

(جاری ہے)

کسی معصوم بچے کا بچپن محفوظ نہ رہا تو آنے والے کل میں معاشرہ مفید شہری سے محروم رہے گا۔

چائلڈ لیبر کو محض ایک مسئلہ نہیں بلکہ نسلوں کے مستقبل کا سوال سمجھتی ہوں۔ چائلڈ لیبر کے خاتمے کیلئے موثر اقدامات کیے جارہے ہیں۔وزیراعلیٰ مریم نواز شریف نے کہا کہ چائلڈ لیبر کیخلاف موثر اقدامات کے ذریعے بچوں کوجبری مشقت سے نجات دلا کرتعلیم کی طرف لا رہے ہیں۔ایسا پنجاب چاہتے ہیں جہاں ہربچہ مزدوری نہیں علم حاصل کرے اورقوم کا مستقبل سنوارے۔