Live Updates

وزیراعلیٰ بلوچستان میر سرفراز بگٹی سے وفاقی وزیر ریلوے محمد حنیف عباسی کی ملاقات

جمعرات 12 جون 2025 22:11

کوئٹہ (اُردو پوائنٹ اخبارتازہ ترین - اے پی پی۔ 12 جون2025ء) وزیراعلیٰ بلوچستان میر سرفراز بگٹی سے جمعرات کو یہاں وفاقی وزیر ریلوے محمد حنیف عباسی نے ملاقات کی ،جس میں بلوچستان میں ریلوے سروس کی بہتری بالخصوص کوئٹہ تا کچلاک شٹل ٹرین سروس شروع کرنے سے متعلق امور پر تفصیلی تبادلہ خیال کیا گیا ۔ملاقات کے دوران صوبائی دارالحکومت کوئٹہ کے سریاب سٹیشن سے کچلاک تک 32 کلومیٹر طویل ریلوے ٹریک کو شٹل سروس کے لیے قابل استعمال بنانے کے حوالے سے تفصیلی بریفنگ دی گئی ۔

ریلوے حکام نے بتایا کہ مجوزہ منصوبے کے تحت پانچ سٹیشنز سریاب، کوئٹہ، شیخ ماندہ، بلیلی اور کچلاک کو اپ گریڈ کیا جائے گا ، اس منصوبے کا تخمینہ 283 ملین روپے لگایا گیا ہے ۔وزیر اعلیٰ بلوچستان میر سرفراز بگٹی نے کہا کہ کوئٹہ تا کچلاک شٹل ٹرین سروس کا منصوبہ نہ صرف قابل عمل ہے بلکہ اس سے کوئٹہ اور گرد و نواح کے عوام کو آرام دہ اور با سہولت سفری سہولیات میسر آئیں گی ۔

(جاری ہے)

انہوں نے کہا کہ اس منصوبے پر سنجیدہ غور و فکر جاری ہے ،اس پر عمل درآمد سے صوبائی دارالحکومت پر بڑھتے ہوئے ٹریفک دبا ئو میں نمایاں کمی آئے گی ۔وفاقی وزیر ریلوے محمد حنیف عباسی نے اس موقع پر کہا کہ پاکستان ریلوے کی معاونت سے کوئٹہ میں عالمی معیار کا فٹ بال گرائونڈ بھی تعمیر کیا جائے گا تاکہ نوجوانوں کو کھیلوں کی بہترین سہولیات فراہم کی جا سکیں ۔وزیر اعلیٰ بلوچستان نے اس عزم کا اظہار کیا کہ بلوچستان میں ریلویز کے دائرہ کار کو وسعت دے کر عوام کو جدید سفری سہولیات فراہم کی جائیں گی اور وفاقی حکومت کے اشتراک سے انفراسٹرکچر منصوبوں کو تیزی سے عملی شکل دی جائے گی۔