اسلام آباد ہائیکورٹ نے مبینہ دھاندلی کی سماعت کیلئے قائم نئے الیکشن ٹربیونل کو این اے46 سے متعلق بھی کارروائی آگے بڑھانے سے روکتے ہوئے حکم امتناع جاری کردیا

پیر 23 دسمبر 2024 20:00

اسلام آباد (اُردو پوائنٹ اخبارتازہ ترین - اے پی پی۔ 23 دسمبر2024ء) اسلام آباد ہائیکورٹ کے چیف جسٹس عامرفاروق کی عدالت نے میں مبینہ دھاندلی کی سماعت کے لیے قائم نئے الیکشن ٹربیونل کو این اے46 سے متعلق بھی کارروائی آگے بڑھانے سے روکتے ہوئے حکم امتناع جاری کردیااور فریقین کو نوٹس جاری کرکے جواب طلب کرلیا۔پیر کو عامر مسعود مغل کی درخواست پر سماعت کے دوران درخواست گزار وکیل فیصل فرید چودھری عدالت پیش ہوئے،عدالت نے عامر مسعود مغل کی درخواست پر بھی حکم امتناعی جاری کرتے ہوئے الیکشن ٹریبونل کو عامر مسعود مغل کی الیکشن پٹیشن کی حد تک بھی کارروائی سے روک دیا، عدالت نے فریقین کو نوٹس جاری کر کے جواب طلب کر لیا، آئندہ سماعت رجسٹرار آفس مقرر کرے گا۔

(جاری ہے)

این اے 46 سے انجم عقیل خان ایم این اے بنے تھے، جنھیں عامر مسعود مغل نے چیلنج کر رکھا ہے،الیکشن ٹریبونل اب اسلام آباد کے تینوں حلقوں سے متعلق کارروائی آگے نہیں بڑھا سکے گا،اس سے قبل عدالت دیگر دو حلقوں پر بھی حکم امتناع جاری کرچکی ہے،عامر مغل نے نئے الیکشن ٹریبونل کی تعیناتی کو چیلنج کر رکھا ہے، جسٹس (ر) عبدالشکور پراچہ تینوں حلقوں میں مبینہ دھاندلی کے خلاف اپیل سن رہے ہیں، جب کہ الیکشن ٹریبونل نے تینوں حلقوں سے متعلق کیس 24 دسمبر کے لیے مقرر کر رکھا ہے۔