باغبانوں کو امرود کے باغات کی آبپاشی 20 سے25 دن کے وقفہ سے کرنے کا مشورہ

جمعرات 2 جنوری 2025 12:20

فیصل آباد (اُردو پوائنٹ اخبارتازہ ترین - اے پی پی۔ 02 جنوری2025ء) پنجاب کے اضلاع فیصل آباد،جھنگ، ساہیوال، قصور، شیخوپورہ، ننکانہ صاحب، اوکاڑہ، سندھ کے اضلاع لاڑکانہ، دادو، شکارپور، حیدر آباد، خیبرپختونخوا کے اضلاع ہزارہ و مردان وغیرہ کے امرود کی کاشت کیلئے انتہائی موزوں علاقوں میں وسیع پیمانے پر امرود کی کاشت کرنیوالے باغبانوں کو امرود کے باغات کی آبپاشی 20 سے25 دن کے وقفہ سے کرنے کا مشورہ دیا گیا ہے اور کہا گیا ہے کہ امرود کے باغبان ماہ جنوری کے دوران 20 سے25 دن کے وقفہ سے باغات کی آبپاشی کریں تاہم بعدازاں فروری اورمارچ کے دوران آبپاشی کا دورانیہ15سے20 روز کردینا چاہیے تاکہ امرود کی بروقت و مناسب بار آوری کاعمل مکمل ہو سکے۔

ڈپٹی ڈائریکٹر محکمہ زراعت توسیع فیصل آبادعدیل احمد نے بتایاکہ امرود پاکستان کا چوتھا اور صوبہ پنجاب کا تیسرا اہم ترین پھل ہے جس کی پیداوارساڑھے6 لاکھ ٹن سے بھی تجاوز کر گئی ہے۔

(جاری ہے)

انہوں نے بتایاکہ امرود میں اعلیٰ معیار کا وٹامن سی پایاجاتاہے جو ترشاوہ پھلوں سے 5گنا زائد تقویت کے باعث فاسفورس، کیلشیم، آئرن کے حصول کا اہم ذریعہ بھی ہے۔

انہوں نے بتایاکہ امرود سے جیم، جیلی، سکوائش، جوس بلینڈ، جوس کنسنٹریٹ اور کینڈی وغیرہ جیسی مصنوعات بھی تیار کی جاتی ہیں۔ انہوں نے کہاکہ پاکستان کے اکثرعلاقوں میں کچے امرود کو سالن کی طرح بھی پکایاجاتاہے۔ انہوں نے بتایاکہ امرود کی اہم اقسام میں لاڑکانہ صراحی، شرقپوری گولہ، کریلا، سرخا، سلیکشن 313خاص اہمیت کی حامل ہیں۔انہوں نے کہاکہ امرود کاپودا سال میں 2 مرتبہ پھل دیتاہے جس میں سے ایک بار جنوری و فروری اور دوسری بار جولائی و اگست کے مہینے شامل ہیں۔