پنجاب اسمبلی اجلاس میں دو مسوات قوانین پیش ،آبادی میں اضافے کی وجہ سے درپیش مسائل بارے قرارداد منظور

لاہور(اُردو پوائنٹ اخبارتازہ ترین - این این آئی۔ 14 جنوری2025ء) پنجاب اسمبلی کے اجلاس میں دو مسوات قوانین پیش اور آبادی میں اضافے کی وجہ سے درپیش مسائل کے حوالے سے قرارداد منظور کر لی گئی ،ایوان کو آگاہ کیا گیا کہ پنجاب حکومت امسال بھی مارچ میں کلچر ڈے منائے گی۔ پنجاب اسمبلی کا اجلاس گزشتہ روز بھی2 گھنٹے 58 منٹ کی تاخیر سے ڈپٹی سپیکر ملک ظہیر اقبال چنڑ کی صدارت میں شروع ہوا۔

اجلاس کے آغاز پر ڈپٹی سپیکر ظہیر ا قبال چنڑ نے پنجاب اسمبلی کے ایوان میں مہمان گیلری میں بیٹھے سہیل عدنان کوبرٹش جونیئر اوپن سکوائش چمپئن شپ جیتنے پر خراج تحسین کیاجبکہ ایوان میں بیٹھے تمام ممبران نے بھی کھڑے ہو کر بھرپور داد دی ۔پنجاب اسمبلی میں وزرات اطلاعات کے بارے میں صوبائی وزیر عظمی بخاری نے سوالات کے جوابات دئیے ۔

(جاری ہے)

وزیر اطلاعات عظمی بخاری نے اپوزیشن بنچوں کی جانب سے الزامات پر کہا کہ فیک خبروں کا دھندا سوشل میڈیا پر تو چل سکتا ہے ایوان میں نہیں، ابھی تک محکمہ اطلاعات میں کوئی تقرری نہیں ہوئی ،اگر کسی نے عزیز واقارب میں بھرتی کا جھوٹا الزام لگایا تو اسے بھگتنا پڑے گا۔

حکومتی رکن امجد علی جاوید نے کہا کہ حکومت پنجاب کی جانب سے پانچ سو ملین روپے کی خطیر رقم مختص کرنے کیلئے ابھی تک اکائونٹ ہی نہیں کھلا جو افسوسناک ہے۔جواب میں وزیر اطلاعات نے کہا کہ پنجاب حکومت کافنڈ اکائونٹ جلد کھل جائے گا، محکمہ خزانہ پنجاب نے کنٹرولر آف اکائونٹس کے ساتھ پانچ سو ملین کی رقم کے لئے فنڈ کااکانٹ کھولنے کے لئے خط لکھ دیا ہے، مریم نواز کی ہدایت پر پنجاب آرٹ کونسل فنکاروں کی مالی مدد کررہا ہے،الحمراآرٹ کونسل کا بھی انڈومنٹ فنڈ قائم کردیا گیا ہے جہاں سے فنکاروں کی مددکی جائے گی۔

پنجاب اسمبلی میں دی پنجاب ایجوکیشن فائونڈیشن ترمیمی بل 2025 اور دی گلوبل یونیورسٹی کمالیہ بل 2025پیش کئے گئے جنہیں ڈپٹی سپیکر نے متعلقہ قائمہ کمیٹیوں کے سپرد کر کے رپورٹ طلب کر لی ۔ پرائیویٹ ممبرڈے کے موقع پر حکومتی رکن امجد علی جاوید کی جانب سے ایوان میں پیش کئے گئے پنجاب ایجوکیشن فائونڈیشن بل کی وزیر قانون صہیب بھرت نے مخالف کی اور کہا کہ چونکہ وزیر تعلیم اس وقت ایوان میں موجود نہیں جب وہ آجائیں اس وقت یہ بل ایوان میں پیش کر دیا جائے ۔

پنجاب اسمبلی کے اجلاس میں بڑھتی ہوئی آبادی کے مسائل کے پیش نظر فوری طورپر فیملی پلاننگ کے نفاذ ، آگاہی ، تعلیمی مہم شروع کے مطالبہ کی قرارداد متفقہ طورپر منظور ہو گئی۔ قرارداد کے متن میںکہا گیا تھا کہ پنجاب کی آبادی بہت تیزی سے بڑھ رہی ہے جس تیزی سے آبادی بڑھ رہی ہے یہ صوبہ کے وسائل کیلئے بہت بڑا خطرہ ہے، پنجاب میں پہلے تعلیم ، صحت کے مسائل ہیں بنیادی سہولیات کی رسائی ، غذائیت ، ئوہا سنگ جیسے مسائل کا سامنا ہے، لازمی ہے کہ ہر شہری کے معیار زندگی اور حقوق کا خیال رکھنا ہوگا،بہترین زندگی گزارنے ، وسائل کی برابری کی بنیادپر دستیابی اور مستحکم ترقی کے مواقع کی فراہمی جیسے مسائل آبادی میں اضافے کی وجہ سے ہیں،آبادی کو کنٹرول کرنے کیلئے فی الفور فیملی پلاننگ پر عملدرآمد کروایا جائے، بڑھتی ہوئی آبادی کے پیش نظر آگاہی اور تعلیمی مہم کا آغاز کیاجائے،۔

پینل آف چیئر مین سمیع اللہ خان نے ایجنڈا مکمل ہونے پر اجلاس آج 15جنوری بروز بدھ وپہر ایک بجے تک ملتوی کردیا۔