امریکن قونصل جنرل کرسٹن کے ہاکنز کی یو ای ٹی لاہور آمد

وائس چانسلر ڈاکٹرشاہد منیر سے ملاقات،پاکستان اور امریکہ کی جامعات میں تعلیمی تبادلے پر تبادلہ خیال کرسٹن کے ہاکنز کی یو ایس ایڈہائیر ایجوکیشن سسٹم کو مستحکم کرنے کے حوالے سے تربیتی ورکشاپ میں خصوصی شرکت

جمعہ 17 جنوری 2025 17:32

لاہور (اُردو پوائنٹ اخبارتازہ ترین - این این آئی۔ 17 جنوری2025ء) یونیورسٹی آف انجینئرنگ اینڈ ٹیکنالوجی لاہور میں یو ایس ایڈ ہائیر ایجوکیشن سسٹم کے استحکام کے حوالے سی4 روزہ تربیتی ورکشاپ کا انعقاد کیا گیا۔ تربیتی ورکشاپ کی اختتامی تقریب میں امریکن قونصل جنرل کرسٹن کے ہاکنز نے بطور مہمان خصوسی شرکت کی اور وائس چانسلر ڈاکٹر شاہد منیر سے ملاقات کی۔

ملاقات میں مختلف امور سمیت پاکستان اور امریکہ کی جامعات میں تعلیمی تبادلے کے حوالے سے تبادلہ خیال کیا گیا۔یہ ورکشاپ یو ایس ایڈ کے تعاون سے امریکی حکومت اور پاکستان کی 16 سرکاری جامعات میں منعقد ہوئی، جس کا مقصد پاکستانی طلبہ کو مستقبل میں کامیاب کیریئر کے لیے درکار وسائل فراہم کرنا تھا۔یونیورسٹی آف یوٹاہ سے ڈاکٹر رینڈی میک کرِلِس اور ڈاکٹر کاری ایلنگسن، امریکن یونیورسٹی قاہرہ سے کیری جانسن اور ڈیوک یونیورسٹی سے ڈاکٹر کیون ڈی آرکو نے سٹوڈنٹ لیڈرشپ اور ذہنی صحت کی خدمات جیسے موضوعات پر تربیت فراہم کی۔

(جاری ہے)

اختتامی تقریب سے خطاب کرتے ہوئے امریکی قونصل جنرل کرسٹن ہاکنز کا کہنا تھا کہ یو ایس ایڈ کا یہ اقدام پاکستان میں تعلیم کے فروغ کے لیے امریکی حکومت کے دیرینہ عزم کا حصہ ہے۔ قونصل جنرل ہاکنز نے کہا کہ امریکہ کئی دہائیوں سے پاکستانی طلبہ کے لیے تعلیمی مواقع کو وسعت دینے میں پاکستان کا ساتھی رہا ہے۔ پاکستانی شراکت داروں کے ساتھ قریبی تعاون سے، امریکہ نے پاکستان بھر میں اسکولوں اور جامعات کی عمارتوں کی تعمیر، پاکستانی نوجوانوں کو بیرون ملک تعلیم حاصل کرنے کے لیے مفت مواقع فراہم کرنے اور موجودہ تعلیمی پروگراموں کے معیار کو بہتر بنانے میں مدد فراہم کی ہے، یو ایس ایڈ ورکشاپ پاکستان میں اعلی تعلیم کو مضبوط بنانے کی جانب ہمارا تازہ ترین اقدام ہے۔

اس موقع پر وائس چانسلر ڈاکٹر شاہد منیر نے پاکستان میں طلبہ معاون خدمات کو مضبوط بنانے میں امریکی تعاون پر شکریہ ادا کرتے ہوئے کہا کہ یہ تربیتی پروگرام جامعات میں طلبہ پر مرکوز طریقہ کار کو فروغ دینے میں اہم کردار ادا کرے گا، جس سے طلبہ اور تعلیمی ادارے دونوں مستفید ہوں گے۔