حریت کانفرنس، دیگر کا شہدائے ہندواڑہ کو خراج عقیدت،شہداء کے مشن کو اسکے منطقی انجام تک پہنچانے کے عزم کا اعادہ

ہفتہ 25 جنوری 2025 17:26

سری نگر (اُردو پوائنٹ اخبارتازہ ترین - این این آئی۔ 25 جنوری2025ء)بھار ت کے غیر قانونی زیر قبضہ جموں وکشمیر میں کل جماعتی حریت کانفرنس نے شہدائے ہندواڑہ اورجنوری کے مہینے میں بھارتی فوجیوں کے ہاتھوں شہید ہونیوالے دیگر کشمیریوں کو شاندارخراج عقیدت پیش کیا ہے ۔کشمیرمیڈیاسروس کے مطابق بھارتی فورسز نے 25 جنوری 1990کوضلع کپواڑ ہ کے قصبے ہندواڑہ میں اندھا دھند فائرنگ کرکے کم از کم21بے گناہ کشمیریوں کو شہید کردیا تھا۔

کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میںشہدائے ہندواڑہ کو انکی 35ویں برسی پر شاندار خراج عقیدت پیش کرتے ہوئے کہاکہ اس دن بھارتی فوجیوں نے پر امن مظاہرین پر اندھادھند گولیاں برسائیں جو اپنے حق خود اردیت کے حق میں نعرے لگا رہے تھے ۔

(جاری ہے)

انہوںنے کہا کہ کشمیری بھارت کے تمام تر مظالم کے باوجود اپنے شہداء کے عظیم مشن کو اسکے منطقی انجام تک پہنچانے کیلئے پر عزم ہیں۔

دیگر حریت رہنماؤں اور تنظیموں نے بھی سری نگر میں اپنے بیانات میں جنوری کے مہینے میں ہونے والے قتل عام کے متاثرین کو یاد کرتے ہوئے عالمی برادری بالخصوص اقوام متحدہ سے اپیل کی ہے کہ وہ قتل عام کے ان بہیمانہ کی تحقیقات کے لیے بھارت پر دباؤ ڈالے ۔یاد رہے کہ بھارتی فوجیوں نے سو 6 جنوری 1993 کوسوپور قصبے میں60 سے زائد شہریوں کو شہید اور 350 سے زائد دکانیں اور رہائشی مکانات نذر آتش کر دیے تھے۔

بھارتی فورسز نے 21 جنوری 1990کو سرینگر کے علاقے بسنت باغ میں پر امن مظاہرین پر اندھا دھند فائرنگ کرکے کم از کم 50 بے گناہ شہریوں کو شہید اور قریب 250 افرادکو زخمی کردیا تھا۔ فوجیوں نے چار روز بعد 25 جنوری 1990 ء کو ہندواڑہ میں21کشمیریوں کو بے رحمی سے قتل کردیا جو بھارتی مظالم کے خلاف پر امن احتجاج کر رہے تھے ۔بھارتی فورسز نے 27جنوری1994 کو کپواڑہ میں ایک اور قتل عام میں27عام شہریوں کو شہید اور 36 زخمی کردیاتھا۔