ہزارہ یونیورسٹی مانسہرہ میں دو روزہ ایڈمشن ایکسپو (کل)شروع ہو گی

پیر 10 فروری 2025 22:10

مانسہرہ (اُردو پوائنٹ اخبارتازہ ترین - اے پی پی۔ 10 فروری2025ء) ہزارہ یونیورسٹی مانسہرہ میں دو روزہ ایڈمشن ایکسپو (کل) منگل کو شروع ہو گی جس میں ہزارہ ڈویژن اور آزاد کشمیر کے مختلف سرکاری و نجی کالجوں اور سکولوں کے طلباء و طالبات شرکت کریں گے۔

(جاری ہے)

ایکسپو کا مقصد نوجوان طلباء و طالبات کو ان کی دلچسپی اور رجحان کے مطابق عصری تقاضوں سے ہم آہنگ اور تعلیمی و تحقیقی پروگراموں کے بارے میں معلومات کے تبادلے سمیت یونیورسٹی کے بہار سمسٹر 2025 میں 4 فیکلٹیز کے 32 شعبوں کے 100 سے زائد تعلیمی پروگراموں کے بارے میں رہنمائی و آگاہی فراہم کرنا ہے تاکہ وہ اپنے لئے موزوں ترین تعلیمی میدان کا انتخاب کرتے ہوئے اپنے مستقبل کو محفوظ بنا سکیں۔

ایکسپو میں شرکت کرنے والے طلبا ء و طالبات کے پک اینڈ ڈراپ کے لئے مانسہرہ، ایبٹ آباد اور ہری پور کے مختلف مقامات سے یونیورسٹی بسیں بھی چلائی جائیں گی۔ ایڈمشن ایکسپو یونیورسٹی کے ملٹی پرپز ہال میں صبح 9 سے شام چار بجے تک جاری رہے گی جس میں یونیورسٹی پروفیسرز، تعلیمی ماہرین اور افسران طلباء کو یونیورسٹی کے تعلیمی پروگراموں میں داخلوں، تعلیمی و تحقیقی سرگرمیوں، ہاسٹلز اور ٹرانسپورٹ سمیت فراہم کی جانے والی دیگر سہولیات کے بارے میں معلومات فراہم کریں گے۔