اپنی 2 بیٹیوں کو انکے نکاح کے بعد موبائل فون کے استعمال کی اجازت دی تھی‘شاہد آفریدی

جمعہ 14 فروری 2025 18:09

لاہور (اُردو پوائنٹ اخبارتازہ ترین - این این آئی۔ 14 فروری2025ء) قومی کرکٹ ٹیم کے سابق کپتان شاہد آفریدی، المعروف بوم بوم لالہ نے انکشاف کیا ہے کہ انہوں نے اپنی 2بیٹیوں کو ان کے نکاح کے بعد موبائل فون کے استعمال کی اجازت دی تھی۔شاہد آفریدی کی جانب سے کچھ ماہ قبل چھوٹی عمر کے بچوں میں سوشل میڈیا کے استعمال اور اپنی بیٹیوں کو موبائل فون دینے سے متعلق دیا گیا بیان وائرل ہو گیا ہے۔

سابق کپتان شاہد آفریدی نے والدین کو مشورہ دیتے ہوئے کہا کہ اپنے بچوں کو سوشل میڈیا ایپلیکیشنز خصوصاً ٹک ٹاک سے نکال کر اصلی دنیا میں لائیں۔شاہد آفریدی نے اپنے خیالات کا اظہار کرتے ہوئے کہا کہ سوشل میڈیا پر آج کل کوئی بھی شخص کسی کے بارے میں کچھ بھی کہہ سکتا ہے، سوشل میڈیا پر آپ جو دل چاہے کہہ سکتے ہیں۔

(جاری ہے)

انہوں نے کہا کہ ٹھیک ہے، آپ کا جو دل چاہتا ہے آپ کہیں مگر اپنے الفاظ کا چناو درست رکھیں، چاہے آپ ڈاکٹر یا انجینئر ہیں اور آپ کی تربیت اچھی نہیں ہے تو آپ کے تعلیم یافتہ ہونے کا کوئی فائدہ نہیں ہے۔

اس دوران کرکٹر شاہین آفریدی کو داماد بنانے کے حوالے سے بوم بوم لالہ نے کہا کہ شاہین کی فیملی نے اس کے اوپر شیروں والی نظر رکھی ہوئی تھی، شاہین کی تربیت اچھی ہوئی ہے، میری اور شاہین کی فیملی کے بزرگ آپس میں ایک دوسرے کو اچھی طرح سے جانتے ہیں۔شاہد آفریدی نے یہ بھی کہا کہ شاہین جن کے ساتھ کھیلتا تھا اور جن کوچز کی نگرانی میں وہ کھیلا سب نے اس کی کافی تعریف کی تھی، اپنی بیٹی کی شاہین سے شادی کے لیے اس کی انکوائری کرنا ضروری تھا کیونکہ لڑکا اچھا ہونا چاہیے اور لڑکی بھی اچھی ہونی چاہیے تاکہ ملک کے لیے ایک اچھی نسل تیار ہو۔