ایسے تو پرچون کی دکان بھی نہیں چلتی جس طرح ہم ملک چلا رہے ہیں، وفاقی وزیرپیٹرولیم

ایک آدھ مشین لانے سے خوشحالی نہیں آئے گی، دقیانوسی اور نوکر شاہی کے طریقوں سے باہر نکلنا ہوگا، ترقی کرنا ہے تو اوئے توئے کے ماحول سے نکلنا پڑے گا؛ مصدق ملک کا تقریب سے خطاب

ساجد علی منگل 18 فروری 2025 13:36

ایسے تو پرچون کی دکان بھی نہیں چلتی جس طرح ہم ملک چلا رہے ہیں، وفاقی ..

اسلام آباد ( اُردو پوائنٹ اخبارتازہ ترین۔ 18 فروری 2025ء ) وفاقی وزیر پیٹرولیم ڈاکٹر مصدق ملک کا کہنا ہے کہ ایسے تو پرچون کی دکان بھی نہیں چلتی جس طرح ہم ملک چلا رہے ہیں۔ اسلام آباد میں سالانہ تکنیکی کانفرنس اور آئل شو سے خطاب کرتے ہوئے انہوں نے کہا کہ کاروبار کرنا حکومت کا کام نہیں ہے، معاملات کو نجی شعبے کے حوالے کرنا ہوگا، اس سلسلے میں پی آئی اے کی نجکاری میں ناکامی ہوئی لیکن ہم ایک بار پھر پی آئی اے کی نجکاری شروع کررہے ہیں، ہمیں ملکی وسائل پر انحصار بڑھانا ہے جس کے لیے دقیانوسی اور نوکر شاہی کے طریقوں سے باہر نکلنا ہوگا، ہمیں حکومتی پالیسیوں میں لبرل آئزیشن کی ضرورت ہے کیوں کہ جس طرح ہم ملک چلا رہے ہیں اس طرح تو پرچون کی دکان بھی نہیں چلتی۔

مصدق ملک کہتے ہیں کہ ہم اس وقت توانائی کے شعبے میں تین طرح کام کر رہے ہیں، حکومت توانائی تک تمام آبادی کی رسائی کیلئے کام کر رہی ہے کیوں کہ ایسی توانائی کا کیا کریں گے جسے عوام خرید نہ سکیں اس لیے توانائی کی قیمتیں عوام تک پہنچانے اور توانائی کی پائیداری کے لیے بھی کام ہورہا ہے، حکومت مقامی پیداوار کو بڑھانے پر توجہ دے رہی ہے، اسی مقصد کے تحت 10 سال کے بعد 40 نئے آف شور بلاکس اور31 آن شور بلاکس کا اعلان کیا گیا ہے کیوں کہ ایک بہت بڑا حصہ ابھی تک دریافت نہیں ہوا۔

(جاری ہے)

انہوں نے کہا کہ اگر گلیشرز تیزی سے پگھلنا شروع ہو گئے تو ہمارا نہری نظام تباہ ہو جائے گا اس لیے جو بھی قدم اٹھانا ہے اسے ماحولیات کو سامنے رکھ کر اٹھانا ہے، تاہم ایک آدھ مشین لانے سے خوشحالی نہیں آئے گی بلکہ پائیدار ترقی کے لیے خود سائنس اور تحقیق کا کام کرنا ہوگا، یہ اعتماد پیدا کریں کہ ہم بھی ایک قوم ہیں، ترقی کرنا ہے تو اوئے توئے کے ماحول سے نکلنا پڑے گا، وزیرِ اعظم کا خواب ہے کہ پاکستانی عزت کی زندگی گزاریں، جب نوجوان میں خود اعتمادی ہو گی کہ وہ کر سکتا ہے تو ملک ترقی کرے گا۔