لیجنڈ اداکار آغا طالش کو بچھڑے 27برس بیت گئے

نصف صدی تک فنی صلاحیتوں کا لوہا منوانے والے آغا طالش نے چار سو سے زائد فلموں میں کام کیا

بدھ 19 فروری 2025 11:40

لیجنڈ اداکار آغا طالش کو بچھڑے 27برس بیت گئے

لاہور(اُردو پوائنٹ اخبارتازہ ترین - این این آئی۔ 19 فروری2025ء)نصف صدی تک فنی صلاحیتوں کا لوہا منوانے والے لیجنڈ اداکار آغا طالش کو مداحوں سے بچھڑے ستائیس برس بیت گئے۔اپنے کردار وں میں ڈھل جانا طالش کی نمایاں خوبی تھی، کریکٹرایکٹر اور وِلن کے کردار ان کی اصل شناخت بنے، پاکستان فلم انڈسٹری میں اکیڈمی کا درجہ رکھنے والے اداکار کا اصل نام آغا علی عباس قزلباش تھا اور وہ 10 نومبر 1927کو لدھیانہ میں پیدا ہوئے تھے۔

(جاری ہے)

انہوں نے 1952میں فلمی کیرئیر کا آغاز کیا تھا اورپنجابی فلمجبرو میں ایک مزاحیہ کردار سے فلموں میں ہٹ ہوئے، آغا طالش نے اپنے چالیس سالہ فلمی کیرئیر میں بے شمار فلموں میں کام کیا اور اپنی اداکاری کا لوہا منوایا۔آغاز طالش کی مشہور فلموں میں فرنگی ،شہید ، نیند،زرقا،کنیز،تیرے عشق نچایا،بھریا میلہ اور امراوجان ادا شامل ہیں، آغا طالش نے چار سو سے زائد فلموں میں کام کیا۔پاکستانی فلموں میں کئی یادگار کردار ادا کرنیوالے آغا طالش19 فروری 1998کو انتقال کرگئے مگر ان کی اداکاری مداحوں کو آج بھی یاد ہے۔