پنجاب کے تمام بڑے شہروں کیلئے سیوریج اور نکاسی آب کے نیا نظام کی منظوری دےدی گئی

وزیراعلیٰ نے 189 بڑے شہروں کا ڈویلپمنٹ پلان طلب کر لیا، شہروں میں سیوریج کے مسائل کیلئے سیوریج بائی پاس پائپ لائن بچھائی جائیگی، بارشی پانی کے فوری نکاس کیلئے سٹوریج ٹینک بنانے کا فیصلہ

ثنااللہ ناگرہ جمعرات 20 فروری 2025 18:52

پنجاب کے تمام بڑے شہروں کیلئے سیوریج اور نکاسی آب کے نیا نظام کی منظوری ..

لاہور ( اردوپوائنٹ اخبار تازہ ترین۔ آئی پی اے نیوزایجنسی۔ 20 فروری 2025ء ) پنجاب کی تاریخ میں پہلی مرتبہ تمام بڑے شہروں میں سیوریج اور نکاسی آب کا نیا سسٹم رائج کیا جائے گا، وزیراعلیٰ پنجاب مریم نوازشریف نے پنجاب کے بڑے شہروں میں سیوریج اور نکاسی آب کیلئے سیوریج اور ڈرینج سسٹم کے میگا پلان کی منظوری دے دی ہے۔ وزیراعلیٰ مریم نوازشریف کی زیر صدارت خصوصی اجلاس منعقد ہوا۔

اجلاس میں پنجاب ڈویلپمنٹ پروگرام پر تفصیلی بریفنگ دی گئی اور پنجاب ڈویلپمنٹ پروگرام نافذ کرنے کی منظوری بھی دی گئی، جس کے تحت ایک لاکھ سے زائد آبادی والے 189شہروں میں سیوریج، واٹر ڈرینج، طوفانی بارش کے پانی کی فوری نکاسی، گلیوں کی فرش بندی اور دیگر ضروری ترقیاتی کام کیے جائیں گے۔

(جاری ہے)

وزیراعلیٰ مریم نوازشریف نے پنجاب ڈویلپمنٹ پروگرام کے تحت ایک لاکھ سے زائد آبادی والے 189شہروں کے لئے پلان فوری طلب کر لیا۔

اجلاس میں بتایا گیا کہ سیوریج کے سسٹم میں بہتری کے لئے سیوریج بائی پاس بنائے جائیں گے اور ڈسپوزل سٹیشن بھی قائم ہونگے۔ بارش کے پانی کی فوری نکاسی کے لئے واٹر سٹوریج ٹینک بھی بنائے جائیں گے۔ واٹر سٹوریج ٹینک میں ذخیرہ شدہ پانی کو آبپاشی اور دیگر مقاصدکے لئے استعمال کیا جاسکے گا۔ اجلاس میں صاف پانی میں سیوریج لائن کے مکس ہونے کی شکایات کے ازالے کے لئے پینے کے صاف پانی کی لائن کو مناسب فاصلے پر متوازی بچھایا جائے گا۔

اجلاس میں بتایا گیا ہر صوبائی حلقے میں 30 ،30 کلو میٹر روڈز کی تعمیر وبحالی کی جائے گی۔ وزیراعلیٰ مریم نوازشریف نے پنجاب ڈویلپمنٹ پروگرام پر عملدرآمد کے لئے فوری اقدامات کا حکم دیا۔ اجلاس میں ماڈل ویلیج بنانے کی تجویز کا بھی جائزہ لیا گیا۔ ڈبلیو اے ٹی ایس این کے تحت پراجیکٹس پر بھی تبادلہ خیال کیا گیا اور پی آئی سی پی کے جاری منصوبوں کا جائزہ لیا گیا۔ وزیراعلیٰ مریم نوازشریف نے اجلاس میں کہا کہ ستھرا پنجاب پروگرام سے صوبہ کے15کروڑ عوام مستفید ہوں گے۔ سیوریج کاموثر نظام نہ ہونے کی وجہ سے ہر شہر میں مسائل کا سامنا ہے۔سیوریج کا دیرپا اورمحفوظ سسٹم بنانے سے روڈز ٹوٹ پھوٹ سے محفوظ رہیں گے۔