کاشتکار کھجور کے نئے پودوں کیلئے زرخیز میراز مین کا انتخاب کریں ،ترجمان ڈیٹ پام ریسرچ انسٹیٹیوٹ

جمعہ 21 فروری 2025 14:37

فیصل آباد (اُردو پوائنٹ اخبارتازہ ترین - اے پی پی۔ 21 فروری2025ء) ڈیٹ پام ریسرچ انسٹیٹیوٹ آری فیصل آباد کی جانب سے کھجور کے باغبانوں اور کاشتکاروں کو ہدایت کی گئی ہے کہ وہ رواں ماہ فروری کے آخر اور اگلے ماہ مارچ کے دوران کھجور کے نئے پودے لگانے کیلئے اچھے نکاس والی ذرخیز میرا زمینوں کا انتخاب کریں تاکہ ان پودوں کی بہترین بڑھوتری کے ذریعے بعد ازاں انہیں اچھی فصل حاصل کرنے میں مدد مل سکے۔

(جاری ہے)

ڈیٹ پام ریسرچ انسٹیٹیوٹ کے ترجمان نے بتایا کہ سعودی عرب اور عراق کے بعد پاکستان کو اعلیٰ معیار کی کھجور پیداکرنیوالے ممالک میں اہم مقام حاصل ہے لیکن پاکستان بھر میں بالعموم جبکہ پنجاب میں بالخصوص کھجور کی کم پیداوار کی وجہ یہاں کے باغبانوں اور کاشتکاروں کا کھجور کے جدید کاشتی امور سے پوری طرح آگاہ نہ ہوناہے۔انہوں نے کہاکہ کھجور کے پودے کیلئے گرم و خشک آب و ہوا درکار ہوتی ہے۔ انہوں نے کہاکہ خاص طور پر پھول نکلتے وقت موسم کا خشک ہونابہت ضروری ہے۔ انہوں نے کہاکہ کاشتکار کھجور کے نئے پودے لگاتے ہوئے ایسی ذرخیز میراز مین کا انتخاب کریں جس میں پانی کا اچھانکاس ہو سکے۔انہوں نے بتایاکہ اس ضمن میں ماہرین زراعت سے مزید رہنمائی بھی حاصل کی جاسکتی ہے۔