اکوڑہ خٹک دھماکہ، خیبرپختونخواہ حکومت کا وفاق سے مذاکرات کے ٹی او آرز فوری منظور کرنے کا مطالبہ

مریم نواز بھارت سے سموگ ڈپلومیسی کرسکتی ہیں تو خیبر پختونخواہ حکومت کو بھی افغانستان سے بات چیت کا موقع ملنا چاہیئے؛ صوبائی مشیراطلاعات بیرسٹر سیف کا مؤقف

ساجد علی اتوار 2 مارچ 2025 12:15

اکوڑہ خٹک دھماکہ، خیبرپختونخواہ حکومت کا وفاق سے مذاکرات کے ٹی او آرز ..

پشاور ( اُردو پوائنٹ اخبارتازہ ترین۔ 02 مارچ 2025ء ) خیبر پختونخواہ حکومت نے وفاق سے مطالبہ کیا ہے کہ افغانستان سے بات چیت کے لیے مجوزہ ٹرمز آف ریفرنس (ٹی او آرز) جلد از جلد منظور کیے جائیں۔ اس حوالے سے اپنے ایک بیان میں مشیر اطلاعات خیبر پختونخواہ بیرسٹر محمد علی سیف نے کہا کہ وفاق ٹی او آرز کی منظوری میں مزید تاخیر سے گریز کرے تاکہ صوبائی حکومت دہشت گردی کے مسئلے پر فوری اقدامات کرسکے، خیبرپختونخواہ حکومت ہنگامی بنیادوں پر ایک وفد افغانستان بھیجنا چاہتی ہے تاکہ خطے میں بڑھتی ہوئی دہشت گردی کا سدباب کیا جا سکے۔

انہوں نے واضح کیا کہ عوام کے جان و مال کی حفاظت صوبائی حکومت کی اولین ترجیح اور ذمہ داری ہے، وفاقی حکومت کی جانب سے خیبر پختونخواہ میں دہشت گردی کے مسئلے کو نظر انداز کیا جا رہا ہے، دیگر صوبوں کے وزرائے اعلیٰ کے بیرونی دوروں پر کوئی اعتراض نہیں کیا جاتا، اگر مریم نواز بھارت سے سموگ ڈپلومیسی کر سکتی ہیں تو خیبر پختونخواہ حکومت کو بھی دہشت گردی جیسے اہم مسئلے پر افغانستان سے بات چیت کا موقع ملنا چاہیے۔

(جاری ہے)

بیرسٹر سیف نے خبردار کیا کہ وفاق کی اس دوہری پالیسی کی وجہ سے صوبہ خیبرپختونخواہ کی عوام میں احساس محرومی میں مزید اضافہ ہو رہا ہے اور یہ کسی بھی طرح ملک کے مفاد میں نہیں ہے، اس لیے ہمارا یہ مطالبہ ہے کہ وفاقی حکومت سیاست سے بالاتر ہو کر صوبے میں دہشت گردی کے خاتمے کے لیے عملی اقدامات کرے۔