ذخیرہ اندوزی میں ملوث عناصر کے خلاف سخت کارروائی کی جائے، وزیراعظم کی ہدایت

عام آدمی کو سستے داموں اشیائے خور دو نوش کی فراہمی یقینی بنائیں، رمضان المبارک میں چینی اور دیگر اشیائے ضروریہ کی قیمتوں کو کنٹرول کرنے کے حوالے سے کوئی کوتاہی برداشت نہیں کی جائے گی؛ اجلاس میں گفتگو

ساجد علی اتوار 2 مارچ 2025 17:50

ذخیرہ اندوزی میں ملوث عناصر کے خلاف سخت کارروائی کی جائے، وزیراعظم ..

اسلام آباد ( اُردو پوائنٹ اخبارتازہ ترین۔ 02 مارچ 2025ء ) وزیراعظم محمد شہباز شریف نے رمضان المبارک میں چینی اور دیگر اشیائے خور دو نوش کی مناسب قیمتوں پر فراہمی کے حوالے سے حکمت عملی بنانے، چینی کی قیمتیں کنٹرول کرنے کے حوالے سے سخت اقدامات اٹھانے اورذخیرہ اندوزی میں ملوث عناصرکے خلاف سخت کارروائی کرنے کی ہدایت کردی۔ وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف کی زیر صدارت ملک میں چینی کی سپلائی اور قیمت کنٹرول کرنے کے حوالے سے اجلاس منعقد ہوا، اس موقع پر وزیراعظم نے کہا کہ گزشتہ مہینوں میں حکومت نے چینی کی سمگلنگ پر سخت کارروائی کی جس سے چینی کی سمگلنگ کے خاتمے میں مدد ملی، وفاقی اور صوبائی حکومتیں مل کر عام آدمی کو سستے داموں اشیائے خور دو نوش کی فراہمی یقینی بنائیں، مضان المبارک میں چینی اور دیگر اشیائے ضروریہ کی قیمتوں کو کنٹرول کرنے کے حوالے سے کوئی کوتاہی برداشت نہیں کی جائے گی۔

(جاری ہے)

بتایا گیا ہے کہ اجلاس کو چینی کی پیداوار کے حوالے سے بریفنگ دی گئی، متعلقہ حکام نے بتایا کہ اس وقت ملک میں چینی کا وافر سٹاک موجود ہے، صوبائی سطح پر چینی کی ارزاں نرخوں پر فروخت کے لئے فئیر پرائس شاپس قائم کی گئی ہیں، چینی کی سمگلنگ کے مکمل خاتمے کیلئے بھرپور اقدامات اٹھائے جائیں گے اور سمگلرز کے خلاف سخت کاروائی کی جائے گی، چینی کی غیر قانونی ذخیرہ اندوزی کے خلاف کارروائی یقینی بنائی جائے گی اور اس حوالے سے ضلعی انتظامیہ مستعدی سے کام کرے گی۔

معلوم ہوا ہے کہ وزیر اعظم کی زیر صدارت ہونے والے اس اجلاس میں نائب وزیراعظم و وزیر خارجہ سینیٹراسحاق ڈار، وفاقی وزیر منصوبہ بندی احسن اقبال، وفاقی وزیر اقتصادی امور احد خان چیمہ، وفاقی وزیر صنعت و پیداوار و قومی غذائی تحفظ رانا تنویر حسین، وفاقی وزیر علی پرویز ملک اور متعلقہ اعلیٰ سرکاری افسران نے شرکت کی، چاروں صوبوں کے چیف سیکرٹریز بذریعہ وڈیو لنک اجلاس میں موجود تھے۔