بھارتی یوٹیوبروپوڈ کاسٹر رنویر الہ آبادیہ نے تحریری معافی مانگ لی

ہفتہ 8 مارچ 2025 12:01

ممبئی(اُردو پوائنٹ اخبارتازہ ترین - این این آئی۔ 08 مارچ2025ء)بھارتی یوٹیوبر و پوڈکاسٹر رنویر الہ آبادیہ نے تحریری معافی مانگتے ہوئے یقین دہانی کرائی ہے کہ آئندہ وہ خواتین سے متعلق گفتگو میں احترام ملحوظ خاطر رکھیں گے۔بھارتی میڈیا کے مطابق رنویر الہ آبادیہ اور اپوروا مکھیجا نیشنل کمیشن فار ویمن (این سی ڈبلیو)کے سامنے پیش ہوئے جہاں انہوں نے گھنٹوں پوچھ گچھ کے بعد تحریری معافی نامہ جمع کرایا۔

رنویر نے این سی ڈبلیو کو یقین دہانی کرائی کہ وہ مستقبل میں اپنے الفاظ کے استعمال میں زیادہ محتاط رہیں گے اور کہا کہ یہ پہلی اور آخری بار ہے جب ایسی غلطی ہوئی ہے اب سے میں سوچ سمجھ کر عورتوں کے حوالے سے بات کروں گا۔این سی ڈبلیو کی چیئرپرسن وجیہہ رہا ٹکر نے کہا کہ کمیٹی کے روبرو 4افراد پیش ہوئے، ان میں تشار پجاری، سوربھ بوترا ، پوروا مکھیجا اور رنویر الہ آبادیہ شامل ہیں۔

(جاری ہے)

انہوں نے کہا کہ کمیشن نامناسب زبان کے استعمال کو قبول نہیں کرے گا، ایسے تبصرے بالکل بھی قابل قبول نہیں ہیں۔واضح رہے کہ یوٹیوبر رنویر الہ آبادیہ گزشتہ ماہ کے آغاز میں یوٹیوب شو انڈیاز گاٹ لیٹنٹ میں والدین سے متعلق متنازع بیانات دینے کے بعد شدید تنقید کی زد میں آ گئے تھے۔یہ متنازع واقعہ کامیڈین سمے رائنا کے یوٹیوب شو میں پیش آیا جہاں رنویر الہ آبادیہ کے ساتھ ساتھ یوٹیوبر اشیش چنچلانی، اپوروا مکھیجا اور کامیڈین جسپریت سنگھ شامل تھے۔

شو میں نامناسب تبصرے کے بعد تنازع کھڑا ہوا اور مقدمات بھی درج کیے گئے، رنویر الہ آبادیہ نے اس پر ویڈیو کے ذریعے عوام سے معافی بھی مانگی تھی، جس میں رنویر نے کہا تھا کہ میں معافی چاہتا ہوں، میرا تبصرہ نہ صرف نامناسب تھا بلکہ وہ مزاحیہ بھی نہیں تھا، کامیڈی میرا میدان نہیں، معافی کے باوجود رنویر کو قانونی کارروائی کا سامنا کرنا پڑا تھا۔